ലണ്ടന്‍: ഭൂമിയുടെ വിഭിന്ന കോണുകളില്‍നിന്ന് ലണ്ടന്‍ നഗരം ലാക്കാക്കിയെത്തുന്ന കായികാവേശങ്ങള്‍ക്ക് കൂടൊരുക്കാന്‍ ഒളിമ്പിക് വില്ലേജ് ഒരുങ്ങി. ഈസ്റ്റ് ലണ്ടനില്‍ സ്ട്രാറ്റ്ഫോഡിനരികെയുള്ള മുഖ്യമത്സരവേദിയായി ഒളിമ്പിക് പാര്‍ക്കിന് തൊട്ടരികിലായാണ് 3,60,000 ചതുരശ്ര മീറ്റര്‍ വിസ്തൃതിയില്‍ സ്ഥാപിച്ചിരിക്കുന്ന ഒളിമ്പിക് ഗ്രാമം. ജൂലൈ 27ന് തിരിതെളിയുന്ന ലണ്ടന്‍ ഒളിമ്പിക്സിന്റെ അരങ്ങുകൊഴുപ്പിക്കാനെത്തുന്ന 16,000 അത്ലറ്റുകള്‍ക്കും ഒഫീഷ്യലുകള്‍ക്കും ആധുനിക സൗകര്യങ്ങളൊരുക്കി കാത്തിരിക്കുകയാണ് ഹരിതാഭയില്‍ മുങ്ങിയ ഈ കായികഗ്രാമം.
താരങ്ങളില്‍ പലരും ഇതിനകം ഒളിമ്പിക് ഗ്രാമത്തിലെത്തിയിട്ടുണ്ട്. ആയിരത്തിലധികം പേര്‍ തിങ്കളാഴ്ച കൂടണയുന്നതോടെ ഗ്രാമത്തില്‍ ആവരങ്ങളുയര്‍ന്നുതുടങ്ങും. അടുത്ത ആഴ്ചയോടെ അത്ലറ്റുകള്‍ മിക്കവരും എത്തുന്നതോടെ വില്ലേജ് സജീവമാകും. ഒരു മാസത്തോളം ഒളിമ്പിക് ഗ്രാമം മുഴുവന്‍ ഈ ആളനക്കങ്ങളാല്‍ മുഖരിതമാകും.
2818 അപാര്‍ട്മെന്റുകളാണ് വില്ലേജിലുള്ളത്. ഇതില്‍ ഓരോന്നിലും ഏഴു മുതല്‍ എട്ടുവരെ ബെഡ്റൂമുകളുണ്ട്. ഓരോ ബെഡ്റൂമിലും രണ്ടു പേര്‍ വീതമാണ് താമസിക്കുക.
ഒരേസമയം 5500 പേര്‍ക്ക് ഭക്ഷണം കഴിക്കാവുന്ന വിശാല ഡൈനിങ് ഏരിയ വില്ലേജിന്റെ പ്രധാന സവിശേഷതകളിലൊന്നാണ്. ഫ്രഞ്ച്, അമേരിക്കന്‍, ഇംഗ്ളീഷ്, ആഫ്രിക്കന്‍, കരീബിയന്‍, ഇന്ത്യന്‍ എന്നിങ്ങനെ വിവിധതരം ഭക്ഷണങ്ങള്‍ 205 രാജ്യങ്ങളില്‍നിന്നുള്ള അത്ലറ്റുകള്‍ക്ക് തെരഞ്ഞെടുക്കാം. ഹലാല്‍ ഭക്ഷണങ്ങള്‍ക്കായി പ്രത്യേക വിഭാഗവുമുണ്ട്. 24 മണിക്കൂറും പ്രവര്‍ത്തിക്കുന്നതാണ് ഡൈനിങ് ഏരിയ.
വില്ലേജിനുള്ളില്‍ 'വില്ലേജ് പ്ലാസ' എന്ന ചെറിയ 'അങ്ങാടി'യുമുണ്ട്. കോഫിഷോപ്, ബാങ്ക്, ബ്യൂട്ടിപാര്‍ലര്‍, പോസ്റ്റോഫിസ്, ഡ്രൈക്ളീന്‍ ഷോട്ട് തുടങ്ങിയവ ഈ ഹൈസ്ട്രീറ്റിലുണ്ടാകും.
ലണ്ടന്‍ മേയര്‍ ബോറിസ് ജോണ്‍സണ്‍ വ്യാഴാഴ്ച ഒളിമ്പിക് ഗ്രാമം സന്ദര്‍ശിച്ച് സൗകര്യങ്ങള്‍ വിലയിരുത്തി. അത്യാധുനിക സജ്ജീകരണങ്ങളടങ്ങിയ വില്ലേജിലെ താമസം സുരക്ഷിതവും ആസ്വാദ്യകരവുമായിരിക്കുമെന്നു പറഞ്ഞ അദ്ദേഹം, ലണ്ടനില്‍ താരങ്ങള്‍ക്ക് തങ്ങളുടെ പ്രകടനത്തെക്കുറിച്ച് മാത്രമേ ആശങ്കപ്പെടേണ്ടിവരുകയുള്ളൂവെന്നും കൂട്ടിച്ചേര്‍ത്തു.