മാഞ്ചസ്റ്റര്‍: രവി ബൊപ്പാരയുടെ ഓള്‍റൗണ്ട് മികവില്‍ ആസ്ട്രേലിയക്കെതിരായ അഞ്ചാം ഏകദിനത്തില്‍ ഇംഗ്ളണ്ടിന് തകര്‍പ്പന്‍ ജയം. ജയത്തോടെ അഞ്ചു മത്സരങ്ങളടങ്ങിയ പരമ്പര 4-0 ത്തിന് ഇംഗ്ളണ്ട് തൂത്തുവാരി. ആദ്യം ബാറ്റ് ചെയ്ത ആസ്ട്രേലിയയെ 145 റണ്‍സിന് ചുരുട്ടിക്കെട്ടിയ ഇംഗ്ളണ്ട് മൂന്നു വിക്കറ്റ് നഷ്ടത്തില്‍ ലക്ഷ്യം കണ്ടു.
ടോസ് നേടിയ ഇംഗ്ളണ്ട് ആസ്ട്രേലിയയെ ബാറ്റിങ്ങിനയക്കുകയായിരുന്നു. മികച്ച ഫോമില്‍ കളി തുടങ്ങിയെങ്കിലും ആദ്യ വിക്കറ്റിനുശേഷം ആസ്ട്രേലിയന്‍ താരങ്ങള്‍ കൂട്ടത്തോടെ കൂടാരം കയറി. ഓപണര്‍ വാര്‍ണര്‍(32), ഡേവിഡ് ഹസ്സി (46)എന്നിവര്‍ക്ക് മാത്രമാണ് ഭേദപ്പെട്ട പ്രകടനം പുറത്തെടുക്കാനായത്. ഇംഗ്ളണ്ടിനു വേണ്ടി ബൊപ്പാരയും ട്രഡ്വെല്ലും രണ്ടു വിക്കറ്റ് വീതം വീഴ്ത്തി. മറുപടി ബാറ്റിങ്ങിനിറങ്ങിയ ഇംഗ്ളണ്ടിന് വേണ്ടി അലിസ്റ്റര്‍ കുക്ക് (58) രവി ബൊപ്പാര (52) എന്നിവര്‍ അര്‍ധ സെഞ്ച്വറി സ്വന്തമാക്കി.