ഹരാരെ: മുന്‍ സിംബാബ്വെ ക്രിക്കറ്റ് ടീം ക്യാപ്റ്റന്‍ തതേന്ദ തയ്ബു അന്താരാഷ്ട്ര ക്രിക്കറ്റില്‍നിന്ന് വിരമിച്ചു. 11 വര്‍ഷം നീണ്ട അന്താരാഷ്ട്ര കരിയറിനാണ് അപ്രതീക്ഷിതമായി വിരാമമിട്ടത്. ശിഷ്ട ജീവിതം മതപരമായ പ്രവര്‍ത്തനങ്ങള്‍ക്ക് മാറ്റിവെക്കാനാണ് വിക്കറ്റ് കീപ്പര്‍ ബാറ്റ്സ്മാനായ തയ്ബുവിന്റെ തീരുമാനം. ടെസ്റ്റ് ക്രിക്കറ്റ് ചരിത്രത്തിലെ ഏറ്റവും പ്രായം കുറഞ്ഞ ക്യാപ്റ്റന്‍ എന്ന ബഹുമതി തയ്ബുവിന്റെ പേരിലാണ്.
രാജ്യത്തിനായി കളിക്കാന്‍ സാധിച്ചത് ഭാഗ്യവും അഭിമാനവുമായി കണക്കാക്കുന്നു. തന്റെ സേവനം ഇനി ദൈവ സന്നിധിയിലാണെന്നും മതപരമായ കാര്യങ്ങളില്‍ ശ്രദ്ധകേന്ദ്രീകരിക്കലാണ് ലക്ഷ്യമെന്നും വിരമിക്കല്‍ പ്രഖ്യാപനം നടത്തവേ തയ്ബു പറഞ്ഞു.
2004ല്‍ 21ാമത്തെ വയസ്സിലാണ് സിംബാബ്വെ ടെസ്റ്റ് ക്രിക്കറ്റ് ടീമിന്റെ ക്യാപ്റ്റനായി തയ്ബു ചുമതലേയേല്‍ക്കുന്നത്. 2001ല്‍ ആന്‍ഡി ഫ്ളവറിന് പിന്‍ഗാമിയായിട്ടാണ് തയ്ബു എന്ന വിക്കറ്റ് കീപ്പര്‍ ബാറ്റ്സ്മാന്‍ സിംബാബ്വെ ടീമിലെത്തുന്നത്. സിംബാബ്വെക്കായി 28 ടെസ്റ്റുകളിലും 150 ഏകദിനങ്ങളിലും 29കാരനായ തയ്ബു കളിച്ചിട്ടുണ്ട്.