ന്യൂദല്‍ഹി: കളിക്കിടെ ഗോള്‍ കീപ്പറുമായി കൂട്ടിയിടിച്ച് ഫുട്ബാള്‍ താരം മരിച്ചു. ബംഗാളിലെ ജല്‍പായിഗുരിയില്‍ നടന്ന പ്രാദേശിക ലീഗ് മത്സരത്തിനിടെയാണ് സംഭവം. രായികാട്പറ സ്പോര്‍ട്സ് അസോസിയേഷന്‍ താരം മഹേഷ് താപ്പയാണ് (27) ഗോള്‍കീപ്പറുമായുള്ള കൂട്ടിയിടിയില്‍ മരിച്ചത്. ഗോള്‍കീപ്പറുടെ കാല്‍മുട്ട് മഹേഷ് താപ്പയുടെ നെഞ്ചില്‍ ഇടിക്കുകയായിരുന്നു.
പരിക്കേറ്റ മഹേഷ് താപ്പയെ ഉടന്‍ തൊട്ടടുത്തുള്ള ജല്‍പായിഗുരി സാധാര്‍ ആശുപത്രിയില്‍ എത്തിച്ചെങ്കിലും ഐ.സി.യുവില്‍ ഒഴിവില്ലാത്തതു കാരണം പ്രവേശിപ്പിക്കാനായില്ല. തുടര്‍ന്ന് മറ്റൊരു നഴ്സിങ് ഹോമില്‍ എത്തിച്ചെങ്കിലും അവിടെയും മതിയായ സൗകര്യങ്ങളില്ലാത്തതിനാല്‍ പ്രവേശിപ്പിക്കാനായില്ല. തുടര്‍ന്ന് മറ്റൊരു ആശുപത്രിയിലേക്ക് കൊണ്ടുപോകവേ മഹേഷ് മരിക്കുകയായിരുന്നു.
നാലു മാസം മുമ്പ് ബാംഗ്ളൂര്‍ ഫുട്ബാള്‍ താരം വെങ്കടേഷ് കളിക്കിടെ ഹൃദയാഘാതംമൂലം മരിച്ചിരുന്നു. 2004ല്‍ ഡെംപോയുടെ ബ്രസീലിയന്‍ സ്ട്രൈക്കര്‍ കൃസ്റ്റ്യാനോ ജൂനിയര്‍ മോഹന്‍ ബഗാന്‍ ഗോള്‍കീപ്പര്‍ സുബ്രതാ പോളുമായി കളിക്കിടെ കൂട്ടിയിടിച്ച് മരണപ്പെട്ടിരുന്നു.