ലണ്ടന്‍: ഈ മാസം തുടങ്ങുന്ന ഒളിമ്പിക്സില്‍ ആതിഥേയ ഫുട്ബാള്‍ ടീമിനെ മാഞ്ചസ്റ്റര്‍ യുനൈറ്റഡിന്‍െറ വെറ്ററന്‍ മിഡ്ഫീല്‍ഡര്‍ റ്യാന്‍ ഗിഗ്സ് നയിക്കുമെന്ന് കോച്ച് സ്റ്റുവാര്‍ട്ട് പിയേഴ്സ് അറിയിച്ചു. വെയ്ല്‍സ് ദേശീയ ജഴ്സിയില്‍ സുപ്രധാന ടൂര്‍ണമെന്‍റുകളിലൊന്നും കളത്തിലിറങ്ങാന്‍ അവസരം ലഭിക്കാതിരുന്ന ഗിഗ്സിന് ബ്രിട്ടീഷ് ഫുട്ബാള്‍ ടീമിനെ നയിക്കാനുള്ള നിയോഗമെത്തുന്നത് 38ാം വയസ്സിലാണ്്.
മാഞ്ചസ്റ്റര്‍ യുനൈറ്റഡ് ക്ളബിനൊപ്പം 12 പ്രീമിയര്‍ ലീഗ് കിരീടനേട്ടങ്ങളിലും അഞ്ച് എഫ്.എ കപ്പ് ജയങ്ങളിലും പങ്കാളിയായ ഗിഗ്സ് രണ്ടു തവണ ചാമ്പ്യന്‍സ് ലീഗ് കിരീടത്തിലും മുത്തമിട്ടിട്ടുണ്ട്. വെയ്ല്‍സിനു വേണ്ടി 64 രാജ്യാന്തര മത്സരങ്ങളില്‍ കളത്തിലിറങ്ങിയ ഗിഗ്സ്, ഇന്‍റര്‍നാഷനല്‍ ഫുട്ബാളില്‍നിന്ന് 2007ല്‍ പടിയിറങ്ങിയിരുന്നു.
ഫുട്ബാളില്‍ അണ്ടര്‍ 23 താരങ്ങളാണ് ഒളിമ്പിക്സില്‍ കളത്തിലിറങ്ങുന്നത്. എന്നാല്‍, ഈ പ്രായപരിധിക്ക് മുകളിലുള്ള മൂന്ന് പേരെ ഓരോ ടീമിലും അണിനിരത്താം. ഗിഗ്സിനു പുറമെ വെയ്ല്‍സില്‍നിന്നു തന്നെയുള്ള ലിവര്‍പൂള്‍ മിഡ്ഫീല്‍ഡര്‍ ക്രെയ്ഗ് ബെല്ലാമിയും മാഞ്ചസ്റ്റര്‍ സിറ്റി ഡിഫന്‍ഡര്‍ മിക റിച്ചാര്‍ഡ്സുമാണ് ബ്രിട്ടീഷ് ടീമിലെ മറ്റു ‘മുതിര്‍ന്ന’ താരങ്ങള്‍.
തന്‍െറ അനുഭവസമ്പത്ത് ക്യാപ്റ്റനെന്ന നിലയില്‍ ടീമിലെ യുവതാരങ്ങള്‍ക്ക് പ്രചോദനമേകുന്ന വിധത്തില്‍ വിനിയോഗിക്കാന്‍ കഴിയുമെന്നാണ് പ്രതീക്ഷയെന്ന് ഗിഗ്സ് പ്രതികരിച്ചു. അരനൂറ്റാണ്ടിനു ശേഷം ഒളിമ്പിക്സിന്‍െറ പുല്‍ത്തകിടിയിലിറങ്ങുന്ന ബ്രിട്ടീഷുകാര്‍ ജൂലൈ 20ന് ആദ്യകളിയില്‍ റിവര്‍സൈഡ് സ്റ്റേഡിയത്തില്‍ കരുത്തരായ ബ്രസീലുമായി മാറ്റുരക്കും.