ലിസ്ബണ്‍: സ്പെയിനിനെതിരായ യൂറോകപ്പ് സെമിഫൈനല്‍ ഷൂട്ടൗട്ടില്‍ പോര്‍ചുഗലിന്റെ അവസാന പെനാല്‍റ്റി കിക്ക് ക്രിസ്റ്റ്യാനോ റൊണാള്‍ഡോ ചോദിച്ചുവാങ്ങുകയായിരുന്നുവെന്ന് വെളിപ്പെടുത്തല്‍. സഹതാരം നാനിയാണ് ഇക്കാര്യം പുറത്തുവിട്ടത്.
പോര്‍ചുഗലിന്റെ ബ്രൂണോ ആല്‍വ്സും ജൊവോ മൗടീന്യോയും കിക്ക് പാഴാക്കിയതോടെ ക്രിസ്റ്റ്യാനോയുടെ അവസരം നഷ്ടമായി പോര്‍ചുഗല്‍ 2-4ന് തോല്‍വി വഴങ്ങിയിരുന്നു. ക്രിസ്റ്റ്യാനോയെ അവസാന കിക്കെടുക്കാന്‍ ചുമതലപ്പെടുത്തിയതിന്റെ പേരില്‍ കോച്ച് പൗലോ ബെന്റോക്കെതിരെ കടുത്ത വിമര്‍ശവും ഉയര്‍ന്നു. എന്നാല്‍, ഇതില്‍ വിവാദത്തിന് കാര്യമില്ല. ഷൂട്ടൗട്ടിലെ വിധി നിര്‍ണയം ഭാഗ്യ പരീക്ഷണമാണ്. വിജയം പോര്‍ചുഗല്‍ അര്‍ഹിച്ചതായിരുന്നു -നാനി പറഞ്ഞു. ഫൈനലില്‍ ഇറ്റലിയെ 4-0 ത്തിന് തോല്‍പിച്ച് സ്പെയില്‍ തുടര്‍ച്ചയായി രണ്ടാം തവണയും യൂറോ ചാമ്പ്യന്മാരായി.