കൊളംബോ: പാകിസ്താന്‍-ശ്രീലങ്ക രണ്ടാം ടെസ്റ്റ് സമനിലയില്‍ കലാശിച്ചു. അഞ്ചാം ദിവസം പാകിസ്താന്‍ കുറിച്ച 261 റണ്‍സ് ലക്ഷ്യം തേടി ഇറങ്ങിയ ആതിഥേയര്‍ രണ്ടിന് 86 എന്ന നിലയിലെത്തിയപ്പോഴാണ് കളി സമനിലയിലായ പ്രഖ്യാപനം വന്നത്. സ്കോര്‍: പാകിസ്താന്‍ ആറിന് 551 ഡിക്ള., രണ്ടിന് 100 ഡിക്ള., ശ്രീലങ്ക 391, രണ്ടിന് 86.
തലേദിവസം ഒന്നാമിന്നിങ്സ് സെഞ്ച്വറിയുമായി ക്രീസിലുണ്ടായിരുന്ന സങ്കക്കാര ബുധനാഴ് ഇരട്ട ശതകത്തിനരികില്‍ (192) വീണു. അധികം താമസിയാതെ അവര്‍ 391ന് പുറത്താവുകയും ചെയ്തു. തുടര്‍ന്ന് രണ്ടാമിന്നിങ്സ് ആരംഭിച്ച സന്ദര്‍ശകര്‍ രണ്ടിന് 100ലെത്തിയപ്പോള്‍ 261 റണ്‍സ് ലക്ഷ്യം നിശ്ചയിച്ച് ഡിക്ളയര്‍ ചെയ്യുകയായിരുന്നു. കളി അവസാനിക്കുമ്പോള്‍ രണ്ടിന് 86ല്‍ നിന്ന ലങ്കക്കുവേണ്ടി സങ്കക്കാരയും (24) ക്യാപ്റ്റന്‍ മഹേല ജയവര്‍ധനെയുമായിരുന്നു (ഒന്ന്) ക്രീസില്‍. ഒന്നാമിന്നിങ്സില്‍ അഞ്ച് വിക്കറ്റെടുത്ത പാക് പേസര്‍ ജുനൈദ് ഖാനാണ് മാന്‍ ഓഫ് ദ മാച്ച്. മൂന്ന് മത്സരങ്ങളടങ്ങിയ പരമ്പരയില്‍ ശ്രീലങ്ക 1-0ത്തിന് മുന്നിലാണ്. അവസാന ടെസ്റ്റ് ഈ മാസം എട്ടിന് പല്ലേകീലില്‍ ആരംഭിക്കും.