ദോഹ: രണ്ടാം ഖലീഫ ഉമര്‍ ബിന്‍ ഖത്താബിനെ ആസ്പദമാക്കി ചിത്രീകരണം പൂര്‍ത്തിയായി വരുന്ന പരമ്പര റമദാനില്‍ സംപ്രേഷണം ആരംഭിക്കുമെന്ന് ഖത്തര്‍ ടി.വി ഡയറക്ടര്‍ മുഹമ്മദ് ബിന്‍ അബ്ദുറഹ്മാന്‍ അല്‍കുവാരി അറിയിച്ചു. ഇസ്ലാമിക ചരിത്രത്തിലെ പ്രൗഢോജ്ജ്വല വ്യകിതിത്വമായ ഉമറിന്‍െറ ജീവചരിത്രം അനാവരണം ചെയ്യുന്ന പരമ്പര ഖത്തര്‍ ടി.വിയും എം.ബി.സി ഗ്രൂപ്പും സംയുക്തമായാണ് നിര്‍മിക്കുന്നത്.
എന്നാല്‍, ഉമറിനെ പോലുള്ള മഹത് വ്യക്തിത്വങ്ങളുടെ ചിത്രം പ്രദര്‍ശിപ്പിക്കാന്‍ പറ്റുമോയെന്ന വിഷയത്തില്‍ അഭിപ്രായ വ്യത്യാസമുണ്ട്. പരമ്പരയില്‍ അദ്ദേഹത്തിന്‍െറ ശബ്ദം മാത്രം കേള്‍പ്പിക്കുകയാണ് ഉത്തമമെന്ന് വിവിധ കോണുകളില്‍ നിന്ന് അഭിപ്രായം ഉയര്‍ന്നിട്ടുണ്ട്. നിര്‍മ്മാണം പൂര്‍ത്തിയായ ശേഷം മതകാര്യ സമിതി പരിശോധിച്ച് അവര്‍ നിര്‍ദേശിക്കുന്ന മാറ്റങ്ങളോടു കൂടിയായിരിക്കും പരമ്പര സംപ്രേഷണം ചെയ്യുകയെന്ന് ഖത്തര്‍ ടെലിവിഷന്‍ ഡ്രാമ-സീരിയല്‍ വിഭാഗം മേധാവി ഫൈസല്‍ ബിന്‍ ജാസിം ആല്‍ഥാനി വക്തമാക്കി. ലോകം കണ്ടതില്‍ ഏറ്റവും നീതിമാനായ ഭരണാധികാരിയെന്ന് മഹാത്മാഗാന്ധി വരെ പ്രശംസിച്ച ഉമറിനെ സംബന്ധിച്ച പരമ്പരയെ പ്രേക്ഷകര്‍ ഏറെ ആകാംക്ഷയോടെയാണ് കാത്തിരിക്കുന്നത്.