ലണ്ടന്‍: പ്രമുഖ താരങ്ങളായ റോജര്‍ ഫെഡററും സെറീന വില്യംസും വിംബ്ള്‍ഡണ്‍ ടെന്നിസ് ടൂര്‍ണമെന്റിന്റെ പ്രീ ക്വാര്‍ട്ടര്‍ ഫൈനലില്‍ പ്രവേശിച്ചു. വിക്ടോറിയാ അസാരെങ്ക, അന ഇവാനോവിച്, പെട്രാ ക്വിറ്റോവ തുടങ്ങിയവരും അവസാന റൗണ്ടില്‍ ഇടംപിടിച്ചപ്പോള്‍ സാറ ഇറാനി മൂന്നാം റൗണ്ടില്‍ തോറ്റുമടങ്ങി.
പുരുഷ സിംഗ്ള്‍സ് മൂന്നാം റൗണ്ടില്‍ ഫ്രഞ്ച് താരം ജൂലിയാന്‍ ബെനേറ്റക്കെതിരെയായിരുന്നു മൂന്നാം സീഡും സ്വിറ്റ്സര്‍ലന്‍ഡുകാരനുമായ ഫെഡററുടെ ജയം. അഞ്ച് സെറ്റ് നീണ്ട കനത്തപോരാട്ടത്തിനൊടുവിലാണ് ബെനേറ്റ കീഴടങ്ങിയത്. സ്കോര്‍: 4-6, 6-7, 6-2, 7-6, 6-1. വനിതാ സിംഗ്ള്‍സില്‍ അമേരിക്കക്കാരിയും ആറാം സീഡുമായ സെറീന 6-7, 6-2, 9-7ന്  ചൈനയുടെ യീ ഴെങ്ങിനെ വീഴ്ത്തി.
ചെക് റിപ്പബ്ലിക് താരമായ ക്വിറ്റോവ 6-1, 6-0ത്തിന് അമേരിക്കയുടെ വര്‍വറ ലെപ്ചെങ്കോയെ തകര്‍ത്തപ്പോള്‍ സെര്‍ബിയക്കാരിയായ അന ഇവാനോവിച് ജര്‍മനിയുടെ ജൂലിയ ജോര്‍ജസിനെ 3-6, 6-3, 6-4ന് തോല്‍പിച്ചു. രണ്ടാം സീഡ് അസാരെങ്ക സ്ലോവാക്യയുടെ ജന സെപെലോവക്കെതിരെയാണ് വിജയം കണ്ടത്. സ്കോര്‍: 6-3, 6-3. കസാഖ്സ്താന്റെ യാരോസ്ലാവ ഷ്വെദോവയോട് 6-0, 6-4ന് ഇറ്റലിക്കാരിയായ ഇറാനി മുട്ടുമടക്കി.

ഭൂപതി-സാനിയ പുറത്ത്; പേസ് സഖ്യം മുന്നോട്ട്

ലണ്ടന്‍: കിരീട പ്രതീക്ഷയായിരുന്ന ഇന്ത്യയുടെ മഹേഷ് ഭൂപതി-സാനിയ മിര്‍സ സഖ്യം വിംബ്ള്‍ഡണ്‍ ടെന്നിസ് ടൂര്‍ണമെന്റില്‍നിന്ന് പുറത്തായി. മിക്സഡ് ഡബ്ള്‍സ് മൂന്നാം റൗണ്ടില്‍ പോള്‍ ഹാന്‍ലീ (ആസ്ട്രേലിയ)-അല്ല കുദ്റത്സേവ (റഷ്യ) ജോടിയാണ് ഇവരെ മടക്കിയത്. സ്കോര്‍: 6-3, 6-1.ലിയാന്‍ഡര്‍ പേസും ചെക് റിപ്പബ്ലിക്കിന്റെ റഡേക് സ്റ്റെപാനക്കും അടങ്ങിയ ടീം പുരുഷ ഡബ്ള്‍സ് മൂന്നാം റൗണ്ടില്‍ പ്രവേശിച്ചു.