ദോഹ: രാജ്യത്തെ വിവിധ ഫാമിലി ബീച്ചുകളില്‍ സുരക്ഷാ സംവിധാനങ്ങള്‍ ശക്തിപ്പെടുത്തുന്നു. ഉംബാബിലെ അല്‍ഖറായിജ്, അല്‍ഖോറിലെ അല്‍ഫര്‍കിയ്യ, സിമൈസിമ, അല്‍ വക്റ ബീച്ചുകളിലാണ് സന്ദര്‍ശകരുടെ സുരക്ഷിതത്വം ഉറപ്പുവരുത്തുന്നതിന് വിവിധ സര്‍ക്കാര്‍ വകുപ്പുകളുടെ സഹകരണത്തോടെ മുനിസിപ്പാലിറ്റി ആന്‍റ് നഗരാസൂത്രണ മന്ത്രാലയം നടപടികള്‍ സ്വീകരിച്ചത്.
ഹമദ് മെഡിക്കല്‍ കോര്‍പറേഷന്‍െറ സഹകരണത്തോടെ വാരാവധി ദിനങ്ങളില്‍ ഈ ബീച്ചുകളില്‍ ആംബുലന്‍സുകള്‍ ലഭ്യമാക്കും. ഖത്തര്‍ റെഡ്ക്രസന്‍്റ് സൊസൈറ്റി, ആഭ്യന്തര സുരക്ഷാസേന (ലഖ്വിയ) എന്നിവയൂം ഇതിന് പിന്തുണ നല്‍കുന്നുണ്ട്. ഈയിടെ ബീച്ചുകളിലുണ്ടായ വിവിധ അപകടങ്ങളുടെ പശ്ചാത്തലത്തിലാണ് ഈ നടപടി. അബൂ ഫന്‍താസ് ബീച്ചില്‍ നീന്താനിറങ്ങിയ മൂന്ന് ഇറാനിയന്‍ ബാലന്‍മാര്‍ മുങ്ങിമരിച്ചിരുന്നു. ഈ മാസാദ്യമായിരുന്നു സംഭവം.