ലണ്ടന്‍: നിലവിലെ ചാമ്പ്യനും ടോപ് സീഡുമായ നൊവാക് ദ്യോകോവിച്ച് വിംബ്ള്‍ഡണ്‍ ടെന്നിസ് ടൂര്‍ണമെന്റിന്റെ പുരുഷ സിംഗ്ള്‍സില്‍ പ്രീക്വാര്‍ട്ടറിലേക്ക് മുന്നേറി. ചെക് റിപ്പബ്ലിക്കിന്റെ റാഡെക് സ്റ്റെപാനക്കിനെതിരെ ആദ്യ സെറ്റ് നഷ്ടമായ ശേഷം പൊരുതിക്കയറിയാണ് ദ്യോകോവിച്ച് ജയം കുറിച്ചത്. സ്കോര്‍: 4-6, 6-2, 6-2, 6-2.
വനിതകളില്‍ ടോപ്സീഡ് മരിയ ഷറപോവ അനായാസ ജയത്തോടെ അവസാന 16ലെത്തി. ഷറപോവ 6-1, 6-4ന് തായ്പേയിയുടെ സു വീ സിഹിനെ പരാജയപ്പെടുത്തി. മഴകാരണം ഏറെ മത്സരങ്ങള്‍ തടസ്സപ്പെട്ട ദിനം 15ാം സീഡ് സബീനെ ലിസിക്കിയും നാലാം റൗണ്ടില്‍ കടന്നു. ലിസിക്കി 7-6, 1-6, 6-2ന് അമേരിക്കന്‍ താരം സ്ലൊവാനോ സ്റ്റീവന്‍സിനെ കീഴടക്കി. പുരുഷ വിഭാഗത്തില്‍ അര്‍ജന്റീനയുടെ 15ാം സീഡ് യുവാന്‍ മൊണാക്കോയെ നേരിട്ടുള്ള സെറ്റുകള്‍ക്ക് കെട്ടുകെട്ടിച്ച് സെര്‍ബിയന്‍ താരം വിക്ടര്‍ ട്രോയിക്കി നാലാം റൗണ്ടിലെത്തി. സ്കോര്‍: 7-5, 7-5, 6-3. 21ാം സീഡ് മിലോസ് റവോനിച്ചിനെ കീഴടക്കി അമേരിക്കയുടെ സാം ഖുറെ മൂന്നാം റൗണ്ടിലെത്തി.
പുരുഷ ഡബ്ള്‍സില്‍ ടോപ് സീഡ്, മാക്സ് മിര്‍നി-ഡാനിയല്‍ നെസ്റ്റര്‍ സഖ്യം രണ്ടാം റൗണ്ടില്‍ തോറ്റുപുറത്തായി.