ലണ്ടന്‍: നാട്ടില്‍ നടക്കുന്ന ഒളിമ്പിക്സില്‍ ദേശീയ ടീമിന്റെ ജഴ്സിയണിയുകയെന്ന ഡേവിഡ് ബെക്കാമിന്റെ സ്വപ്നം പൂവണിയില്ല. ബ്രിട്ടന്റെ 18 അംഗ ടീമില്‍ താനുണ്ടാവില്ലെന്ന് ബെക്കാം അറിയിച്ചു. നേരത്തേ 35 അംഗ സാധ്യതാ സംഘത്തില്‍ ഇടംപിടിച്ചതോടെ ഒരിക്കല്‍ കൂടി രാജ്യാന്തരതലത്തില്‍ പ്രത്യക്ഷപ്പെടാനാവുമെന്ന പ്രതീക്ഷയിലായിരുന്നു 37കാരന്‍.
അമേരിക്കന്‍ ക്ളബായ ലോസ് ആഞ്ജലസ് ഗാലക്സിയുടെ താരമാണ് മുന്‍ ഇംഗ്ളീഷ് ക്യാപ്റ്റനായ ബെക്കാം ഇപ്പോള്‍. അദ്ദേഹത്തിന്റെ പ്രകടനം വിലയിരുത്താന്‍ ദേശീയ കോച്ച് സ്റ്റുവര്‍ട്ട് പിയേഴ്സ് കഴിഞ്ഞയാഴ്ച അമേരിക്കയിലെത്തിയിരുന്നു. ടീമില്‍ ഇടം ലഭിക്കാത്തതിലുള്ള നിരാശ ബെക്കാം മറച്ചുവെച്ചില്ല. കളിക്കാന്‍ അവസരം നല്‍കിയിരുന്നെങ്കില്‍ അതൊരു ആദരവാകുമായിരുന്നു. ബ്രിട്ടന്‍ സ്വര്‍ണം നേടുമെന്ന് പ്രതീക്ഷിക്കുന്നതായും ടീമിന്റെ ഏറ്റവും വലിയ അനുകൂലിയായി താനുണ്ടാവുമെന്നും അദ്ദേഹം കൂട്ടിച്ചേര്‍ത്തു.
ഒളിമ്പിക് ദീപശിഖ ബ്രിട്ടനിലേക്ക് കൊണ്ടുവരാന്‍ നിയോഗിക്കപ്പെട്ട പ്രമുഖരിലൊരാള്‍ ബെക്കാമായിരുന്നു.