ക്വാലാലംപൂര്‍: വിവാദമായ ഡിസിഷന്‍ റിവ്യൂ സിസ്റ്റത്തിന്റെ (ഡി.ആര്‍.എസ്) കാര്യത്തില്‍ ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡിനെ (ബി.സി.സി.ഐ) നിര്‍ബന്ധിക്കാനില്ലെന്ന് ഐ.സി.സിയുടെ പുതിയ ചീഫ് എക്സിക്യൂട്ടിവ് ഡേവിഡ് റിച്ചാര്‍ഡ്സന്‍. ഇക്കാര്യത്തില്‍ അന്താരാഷ്ട്ര ഐക്യം വേണമെന്ന് ഐ.സി.സി ബോര്‍ഡ് തീരുമാനിച്ചിട്ടുണ്ടെങ്കിലും ഇന്ത്യക്ക് അവരുടേതായ രീതിയില്‍ മുന്നോട്ടുപോവാമെന്ന് സ്ഥാനമേറ്റ ശേഷം നടത്തിയ വാര്‍ത്താസമ്മേളനത്തില്‍ അദ്ദേഹം അറിയിച്ചു.പുതിയ സാങ്കേതികവിദ്യ അവതരിപ്പിക്കുമ്പോള്‍ വിവാദമുണ്ടാവുക സ്വാഭാവികം. എന്നാല്‍, സാവധാനം എതിര്‍പ്പ് മാറി. ഇതിനോട് എല്ലാവരും യോജിക്കുന്നതാണ് ഭൂഷണം. എന്നാല്‍, ആരുടെയെങ്കിലും മേല്‍ ഡി.ആര്‍.എസ് അടിച്ചേല്‍പിക്കാന്‍ ഉദ്ദേശിക്കുന്നില്ലെന്ന് റിച്ചാര്‍ഡ്സന്‍ കൂട്ടിച്ചേര്‍ത്തു.
അമ്പയറുടെ തീരുമാനം പുനഃപരിശോധിക്കുന്ന ഡി.ആര്‍.എസ്, ടെസ്റ്റിലും ഏകദിനത്തിലും നിര്‍ബന്ധമാക്കണമെന്നാണ് ഇന്ത്യ ഒഴികെയുള്ള രാജ്യങ്ങളുടെ നിലപാട്. തുടക്കത്തില്‍ ഇതിനെ അനുകൂലിച്ചിരുന്ന ബി.സി.സി.ഐ ഈ സമ്പ്രദായത്തിലെ പിഴവുകള്‍ ചൂണ്ടിക്കാട്ടി എതിര്‍പ്പുമായി രംഗത്തുവരുകയായിരുന്നു. ഇന്ത്യയുടെ മത്സരങ്ങളില്‍ ഇപ്പോള്‍ ഡി.ആര്‍.എസ് ഇല്ല.