ലണ്ടന്‍: പ്രമുഖ താരങ്ങളായ നൊവാക് യോകോവിച്, മരിയ ഷറപോവ, ഡേവിഡ് ഫെറര്‍, സെറീന വില്യംസ് തുടങ്ങിയവര്‍ വിംബ്ള്‍ഡണ്‍ ടെന്നിസ് ടൂര്‍ണമെന്റിന്റെ മൂന്നാം റൗണ്ടില്‍ പ്രവേശിച്ചു. കിം കൈ്ളസ്റ്റേഴ്സ്, സാറ ഇറാനി എന്നിവരും വിജയം കണ്ടപ്പോള്‍ സാമന്ത സ്റ്റോസര്‍ രണ്ടാം റൗണ്ടില്‍ തോറ്റു മടങ്ങി.
പുരുഷ സിംഗ്ള്‍സില്‍ സെര്‍ബിയന്‍ താരവും ഒന്നാം സീഡുമായ യോകോവിചിന്റെ ജയം അമേരിക്കക്കാരനായ റ്യാന്‍ ഹാരിസണോടായിരുന്നു. സ്കോര്‍: 6-4, 6-4, 6-4. സ്പാനിഷ് പ്രതീക്ഷയായ ഫെറര്‍ 7-6, 6-2, 6-4ന് ഫ്രാന്‍സിന്റെ കെന്നി ഡീ ഷെപറെ വീഴ്ത്തി.
വനിതാ സിംഗ്ള്‍സില്‍ ഒന്നാം സീഡും റഷ്യക്കാരിയുമായ ഷറപ്പോവ 7-6, 6-7, 6-0 എന്ന നിലയില്‍ ബള്‍ഗേറിയയുടെ സ്വെതാന പിറങ്കോവയോടാണ് ജയിച്ചത്. ഹങ്കറിയുടെ മെലിന്‍ഡ സിങ്കിനെ അമേരിക്കന്‍ താരമായ സെറീന വില്യംസും കെട്ടുകെട്ടിച്ചു. സ്കോര്‍: 6-1, 6-4. ഇറ്റാലിയന്‍ താരം ഇറാനി 6-1, 6-1ന് ബ്രിട്ടന്റെ ആന്‍ കിയോതാവോങ്ങിനെയാണ് തോല്‍പ്പിച്ചത്. ചെക്ക് റിപ്പബ്ലിക്കിന്റെ ആന്ദ്രിയ ഹ്ലവാക്കോവയോട് 6-3, 6-3ന് ബെല്‍ജിയക്കാരിയായ കൈ്ളസ്റ്റേഴ്സും ജയം കണ്ടപ്പോള്‍ ആസ്ട്രേലിയന്‍ താരമായ സാമന്ത സ്റ്റോസറെ 6-2, 0-6, 6-4ന് നെതര്‍ലന്‍ഡ്സിന്റെ അരാന്റ്സാ റസ് ആണ് മടക്കിയത്.