ലണ്ടന്‍: ഒളിമ്പിക്സില്‍ മഹേഷ് ഭൂപതിയുമായി സഖ്യത്തിനുള്ള ശ്രമങ്ങള്‍ പരാജയപ്പെട്ട ലിയാണ്ടര്‍ പേസിനെ സാന്ത്വനിപ്പിക്കാന്‍ തന്നെ ഇരയാക്കിയെന്ന് സാനിയാ മിര്‍സ. രാജ്യതാല്‍പര്യം മുന്‍നിര്‍ത്തി മിക്സഡ് ഡബ്ള്‍സില്‍ ആരോടൊപ്പവും കളിക്കാന്‍ തയാറാണെന്ന് വ്യക്തമാക്കിയ 25കാരി ഓള്‍ ഇന്ത്യ ടെന്നിസ് അസോസിയേഷനെയും (എ.ഐ.ടി.എ) പേസിനെയും ഭൂപതിയെയും വിമര്‍ശിച്ചു. പ്രമുഖനായ താരത്തെ സമാധാനിപ്പിക്കുന്നതിന് രാജ്യത്തെ ഒന്നാം നമ്പര്‍ കളിക്കാരിയായ തന്നെ അപമാനിക്കുകയായിരുന്നുവെന്ന് ഒളിമ്പിക് ടിക്കറ്റ് ലഭിച്ചതിനുശേഷം പുറത്തിറക്കിയ വാര്‍ത്താക്കുറിപ്പില്‍ സാനിയ തുറന്നടിച്ചു.
‘ഇന്ത്യന്‍ ടെന്നിസിലെ പ്രമുഖര്‍ തമ്മിലുള്ള തര്‍ക്കത്തിലേക്ക് എന്നെ വലിച്ചിഴക്കുകയായിരുന്നു. 21ാം നൂറ്റാണ്ടിലെ സ്ത്രീയായ എനിക്ക് മോഹഭംഗവും അപമാനവുമാണ് അനുഭവപ്പെടുന്നത്. പേസിനെപ്പോലൊരാളോടൊപ്പം കളിക്കാന്‍ അവസരം ലഭിക്കുന്നതിലൂടെ ആദരിക്കപ്പെട്ടതായി തോന്നുമ്പോള്‍ തന്നെ തെരഞ്ഞെടുപ്പിന്‍െറ രീതി പുരുഷമേധാവിത്വം പ്രകടമാക്കുന്നതായിരുന്നു. ഒരു പതിറ്റാണ്ടുകാലമായി രാജ്യത്തിനുവേണ്ടി കളിക്കുന്ന ഞാന്‍ രണ്ടു തവണ ഗ്രാന്‍ഡ്സ്ളാം ചാമ്പ്യനായിട്ടുണ്ട്. പുരുഷ ഡബ്ള്‍സില്‍ പ്രമുഖനായ താരം പങ്കാളിയാവാന്‍ വിസമ്മതിച്ചതിന് നഷ്ടപരിഹാരമെന്നോണമാണ് എന്നെ തെരഞ്ഞെടുത്തിരിക്കുന്നത്’ -ഹൈദരാബാദുകാരി തുടര്‍ന്നു.
പേസോ ഭൂപതിയോ രോഹന്‍ ബൊപ്പണ്ണയോ സോംദേവ് ദേവവര്‍മനോ വിഷ്ണുവര്‍ധനോ ആരായാലും കൂടെ കളിക്കാന്‍ താന്‍ ഒരുക്കമാണ്. ബൊപ്പണ്ണയോടൊപ്പം ഇറങ്ങുന്ന ഭൂപതി അദ്ദേഹത്തോടുള്ള കടമ നിറവേറ്റി. എന്നാല്‍, മെഡല്‍ നേടാനുള്ള ഇന്ത്യയുടെ സാധ്യതകള്‍ കണക്കിലെടുത്ത് അദ്ദേഹം തനിക്ക് നല്‍കിയ ഉറപ്പ് പാലിച്ചില്ലെന്ന് സാനിയ കുറ്റപ്പെടുത്തി.
മിക്സഡില്‍ കൂടെ കളിക്കുമെന്ന് താന്‍ എഴുതി ഉറപ്പുനല്‍കിയാലേ ഡബ്ള്‍സില്‍ വിഷ്ണുവര്‍ധനുമൊത്ത് ഇറങ്ങൂവെന്ന് പേസ് പറഞ്ഞതായി കേട്ടു. ഇത് മൂന്നു പേര്‍ക്കും അപമാനമാണ്. കഴിവുള്ള താരമാണ് വിഷ്ണുവര്‍ധന്‍. അദ്ദേഹത്തോടൊപ്പം ഇറങ്ങുന്നതിലും തനിക്ക് സന്തോഷമേയുള്ളൂ. 2010ലെ ഏഷ്യന്‍ ഗെയിംസില്‍നിന്ന് പ്രമുഖരായ മൂന്നു പുരുഷതാരങ്ങളും വിട്ടുനിന്നപ്പോള്‍ വിഷ്ണുവുമൊത്ത് മിക്സഡ് ഡബ്ള്‍സില്‍ വെള്ളിമെഡല്‍ നേടാനായി. പങ്കാളിയാക്കാന്‍ പറ്റിയ കളിക്കാരനാണ് അദ്ദേഹമെന്ന് സാനിയ പേസിനെ ഓര്‍മിപ്പിച്ചു.
വൈല്‍ഡ് കാര്‍ഡ് വഴി ഒളിമ്പിക്സ് പ്രവേശം നല്‍കിയ അന്താരാഷ്ട്ര ടെന്നിസ് ഫെഡറേഷനോട് അഗാധമായ നന്ദിയുണ്ട്. രണ്ടാം തവണയും രാജ്യത്തെ പ്രതിനിധാനം ചെയ്യാന്‍ അവസരം ലഭിക്കുന്നതില്‍ സന്തോഷവതിയാണ്. എ.ഐ.ടി.എ ടീം പ്രഖ്യാപനം നടത്തിയ അന്നു മുതല്‍ സുഹൃത്തുക്കളും സഹപ്രവര്‍ത്തകരും മാധ്യമങ്ങളും കുടുംബവുമെല്ലാം പലവിധ ചോദ്യങ്ങളുമായാണ് തന്നെ സമീപിച്ചത്. യോഗ്യതയുടെ കാര്യത്തില്‍ ഉറപ്പുകിട്ടാഞ്ഞതിനാലാണ് ആരോടും പ്രതികരിക്കാതിരുന്നതെന്ന് സാനിയ കൂട്ടിച്ചേര്‍ത്തു.

സാനിയയോട് പൂര്‍ണ കടപ്പാടെന്ന് ഭൂപതി

ലണ്ടന്‍: ലണ്ടന്‍ ഒളിമ്പിക്സില്‍ ഒരുമിച്ച് കളിക്കാമെന്ന ഉറപ്പുപാലിക്കാന്‍ താന്‍ ശ്രമിച്ചില്ലെന്ന സാനിയാ മിര്‍സയുടെ ആരോപണത്തിന് മഹേഷ് ഭൂപതിയുടെ മറുപടി. താന്‍ സാനിയയോട് പൂര്‍ണമായും കടപ്പെട്ടിരിക്കുന്നുവെന്നും അവരുടെ കാര്യത്തില്‍ സഹതാപമുണ്ടെന്നും അദ്ദേഹം പറഞ്ഞു. സാനിയയോട് ചോദിക്കാതെയാണ് ടീം തിരഞ്ഞെടുപ്പ് നടത്തിയിരിക്കുന്നത്. കോര്‍ട്ടില്‍ തങ്ങള്‍ക്ക് മികച്ച റെക്കോഡുണ്ട്. അവസരം നല്‍കിയാല്‍ ഒളിമ്പിക്സ് മിക്സഡ് ഡബ്ള്‍സില്‍ താരവുമൊന്നിച്ച് കളിക്കാന്‍ തയാറാണെന്ന് ഭൂപതി കൂട്ടിച്ചേര്‍ത്തു.