ഫുജൈറ: അഞ്ചാമത് മക്തൂം ചാമ്പ്യന്‍ഷിപ്പ് വിപുല പരിപാടികളോടെ ഈവര്‍ഷം റമദാന്‍ ഒന്നിന് ആരംഭിക്കുമെന്ന് സംഘാടകര്‍ അറിയിച്ചു. ഫുജൈറ ഭരണാധികാരി ശൈഖ് ഹമദ് ബിന്‍ മുഹമ്മദ് അല്‍ ശര്‍ഖിയുടെ മകനും ഫുജൈറ കിരീടാവകാശി ശൈഖ് മുഹമ്മദ് ബിന്‍ ഹമദിന്‍െറ ഇളയ സഹോദരനുമായ ശൈഖ് മക്തൂം ബിന്‍ ഹമദിന്‍െറ രക്ഷാകര്‍തൃത്വത്തിലാണ് മക്തൂം ചാമ്പ്യന്‍ഷിപ്പ് നടക്കുന്നത്. ഫുജൈറയിലും പരിസര പ്രദേശങ്ങളിലുമുള്ള എല്ലാ വിഭാഗം ജനങ്ങളുടെയും പ്രാതിനിധ്യവും കൂട്ടായ്മയും ഇതില്‍ ഉറപ്പാക്കാറുണ്ട്. ഫുട്ബാള്‍, ക്രിക്കറ്റ്, തയ്ക്വാണ്ടോ, ബാസ്ക്കറ്റ്ബാള്‍, കമ്പവലി, സൈക്ളിങ്, മോട്ടോര്‍ റെയ്സ്, വീഡിയോ ഗെയിംസ്, വോളിബാള്‍, ചെസ്സ്, ബൗളിങ്, നീന്തല്‍, ഭാരോദ്വഹനം, ജൂഡോ, ബില്യാര്‍ഡ്സ്, ഗുസ്തി എന്നീ ഇനങ്ങളില്‍ ടൂര്‍ണമെന്‍റുകള്‍ നടക്കും.
സ്ത്രീകള്‍ക്ക് പ്രത്യേകമായി ഇന്‍ഡോര്‍ സ്റ്റേഡിയങ്ങളില്‍ ഫുട്ബാള്‍, ബാസ്കറ്റ്ബാള്‍, വോളിബാള്‍ ടൂര്‍ണമെന്‍റുകളുമുണ്ടെന്ന് മക്തൂം ചാമ്പ്യന്‍ഷിപ്പ് ഓര്‍ഗനൈസിങ് കമ്മിറ്റി അധ്യക്ഷന്‍ ഹുസൈന്‍ മുഹമ്മദ് അല്‍ സ്വഫാരി അറിയിച്ചു. വിവരങ്ങള്‍ക്ക്: 050 9892000.
ക്രിക്കറ്റ് ടൂര്‍ണമെന്‍റ് സംഘാടക കമ്മിറ്റി മാനേജറായി അശ്റഫ് ബഷീര്‍ ഉളിയില്‍ ചുമതലയേറ്റു. ക്രിക്കറ്റ് ടീമുകളുടെ രജിസ്ട്രേഷന്‍ ജൂലൈ ഒന്നിന് ആരംഭിക്കും. ഫൈനല്‍ ആഗസ്റ്റ് മൂന്നിന് നടക്കുന്ന രീതിയിലാണ് മത്സരങ്ങള്‍ ക്രമീകരിക്കുക. ആദ്യ മൂന്ന് സ്ഥാനക്കാര്‍ക്ക് യഥാക്രമം 10000, 5000, 3000 ദിര്‍ഹം സമ്മാനമായി നല്‍കുമെന്ന് അശ്റഫ് ബഷീര്‍ ഉളിയില്‍ അറിയിച്ചു. വിവരങ്ങള്‍ക്ക്: 050 5895963.