മനാമ: കഴിഞ്ഞ 20 വര്‍ഷത്തോളമായി ബഹ്റൈനില്‍ ജോലി ചെയ്യുന്ന മലയാളി ഹൃദയാഘാതം മൂലം നിര്യാതനായി. ഇരിങ്ങാലക്കുട കീഴ്ത്താണി കൂടത്തിങ്ങല്‍ വേലായുധനാണ് (44) വ്യാഴാഴ്ച രാത്രി എട്ടരയോടെ സല്‍മാനിയ ആശുപത്രിയില്‍ നിര്യാതനായത്. അടുത്ത മാസം നാട്ടില്‍ പോകാനിരിക്കെയാണ് മരണം. രണ്ടു ദിവസത്തിനിടെ മൂന്നാമത്തെ മലയാളിയാണ് ബഹ്റൈനില്‍ കുഴഞ്ഞു വീണ് മരിക്കുന്നത്.
സഹ്ലയിലെ നാഷണല്‍ മോട്ടോര്‍ കമ്പനിയിലെ ബോഡി ഷോപ്പില്‍ ജോലി ചെയ്യുകയായിരുന്നു. വ്യാഴാഴ്ച ഉച്ചക്ക് ഡ്യൂട്ടി കഴിഞ്ഞ് താമസ സ്ഥലത്ത് എത്തിയ ശേഷം സല്‍മാബാദില്‍ സുഹൃത്തിനെ സന്ദര്‍ശിച്ച് രാത്രി എട്ട് മണിയോടെ റൂമില്‍ തിരിച്ചത്തെിയപ്പോഴാണ് വേലായുധന് നെഞ്ചുവേദന അനുഭവപ്പെട്ടത്. രാത്രി 10 മണിയോടെ മൃതദേഹം മോര്‍ച്ചറിയിലേക്ക് മാറ്റി. നാട്ടിലേക്ക് കൊണ്ടുപോകാനുള്ള നടപടികള്‍ സ്വീകരിച്ചു വരികയാണ്. ഭാര്യ: രജിത. മകന്‍: അമല്‍(വിദ്യാര്‍ഥി).