മനാമ: കുളിമുറിയില്‍ തലയടിച്ചു വീണതിനെ തുടര്‍ന്ന് സല്‍മാനിയ ആശുപത്രിയില്‍ പ്രവേശിപ്പിച്ച മലയാളി യുവാവ് മരിച്ചു. വടകര പുതുപ്പണം പണിക്കോട്ടിയിലെ മഹ്മൂദിന്‍െറ മകന്‍ ഇര്‍ഷാദാണ് (29) വ്യാഴാഴ്ച രാത്രി ഏഴരയോടെ മരിച്ചത്. ഹോട്ടലില്‍ ഡ്രൈവറായി ജോലി ചെയ്തിരുന്ന ഇര്‍ഷാദ് ചൊവ്വാഴ്ച രാത്രി ഈസ്റ്റ് റിഫയിലെ കൂട്ടുകാരുടെ വില്ലയില്‍ വന്നതായിരുന്നു. കുളിമുറിയില്‍ കയറി ഏറെ നേരം കഴിഞ്ഞിട്ടും പുറത്തുവരാതിരുന്നിനെ തുടര്‍ന്ന് വാതി തുറന്നു നോക്കിയപ്പോഴാണ് ഇയാള്‍ വീണു കിടക്കുന്നത് കണ്ടത്. കൂട്ടുകാര്‍ വെള്ളം കൊടുക്കുകയും ബെഡില്‍ എടുത്ത് കിടത്തുകയും ചെയ്തു. ബുധനാഴ്ച രാവിലെ എഴുന്നേറ്റ് പുറത്തിറങ്ങിയപ്പോള്‍ വീണ്ടും തല കറങ്ങി വീഴുകയായിരുന്നുത്രെ. ഉടനെ പൊലീസ് ആംബുലന്‍സില്‍ സല്‍മാനിയ ആശുപത്രിയില്‍ എത്തിച്ചു.
തലയിലെ ഞെരമ്പ് പൊട്ടിയതാണ് മരണ കാരണമെന്നാണ് ഡോക്ടര്‍മാര്‍ പറഞ്ഞത്. കുറച്ചു മുമ്പ് ഇര്‍ഷാദിന്‍െറ വിസ കാലാവധി കഴിഞ്ഞിരുന്നു.
ബില്‍ഡിങ് കണ്‍സ്ട്രക്ഷന്‍ കമ്പനിയിലെ ഇലക്ട്രീഷ്യന്‍ വിസയില്‍ ബഹ്റൈനില്‍ എത്തിയ ഇര്‍ഷാദ് ഹോട്ടലില്‍ ഡ്രൈവറായാണ് ജോലി ചെയ്തിരുന്നത്. മഹ്മൂദിന്‍െറ ഏക മകനായ ഇര്‍ഷാദ് അവിവാഹിതനാണ്. മൃതദേഹം സല്‍മാനിയ ആശുപത്രി മോര്‍ച്ചറിയിലാണുള്ളത്.