ന്യൂദല്‍ഹി: ലിയാണ്ടര്‍ പേസിന്റെ ഡബ്ള്‍സ് പങ്കാളിയെച്ചൊല്ലി ഇന്ത്യന്‍ ടെന്നിസില്‍ ഉടലെടുത്ത പ്രതിസന്ധി രൂക്ഷമാവുന്നു. പേസിനൊപ്പം കളിക്കണമെന്ന ഓള്‍ ഇന്ത്യ ടെന്നിസ് അസോസിയേഷന്റെ (എ.ഐ.ടി.എ) അഭ്യര്‍ഥന രോഹന്‍ ബൊപ്പണ്ണയും തള്ളിക്കളഞ്ഞു. എ.ഐ.ടി.എയുടെ ആവശ്യം തിങ്കളാഴ്ചയും ഭൂപതി നിരാകരിച്ചതോടെ എ.ഐ.ടി.എയോട് വിശദീകരണം ആവശ്യപ്പെട്ട് കേന്ദ്ര കായികമന്ത്രി അജയ് മാക്കന്‍ രംഗത്തെത്തി. രണ്ട് ടീമിനെ അയക്കാന്‍ ഇന്ത്യക്ക് കഴിയുമെന്നിരിക്കെ എന്തിനാണ് ഒരെണ്ണത്തെ മാത്രം കളിപ്പിക്കുന്നതെന്നും മന്ത്രി ചോദിച്ചു.
പങ്കാളി ആരായാലും കുഴപ്പമില്ലെന്ന് പേസ് ആവര്‍ത്തിച്ച് വ്യക്തമാക്കിയിട്ടുണ്ട്. എന്നാല്‍, അദ്ദേഹത്തോടൊപ്പം കളിക്കാനില്ലെന്നും ഒളിമ്പിക്സില്‍ പങ്കെടുക്കുക എന്നത് തന്റെ സ്വപ്നമാണെന്നുമാണ് ബൊപ്പണ്ണ എ.ഐ.ടി.എക്ക് അയച്ച കത്തില്‍ പറയുന്നത്. ഈ വര്‍ഷത്തിന്റെ തുടക്കം മുതല്‍ താന്‍ ഭൂപതിക്കൊപ്പം കളിക്കുകയാണ്. ഒളിമ്പിക്സ് മുന്നില്‍ കണ്ടായിരുന്നു ഇത്. കരിയറില്‍ രണ്ടു തവണ മാത്രമാണ് പേസിന്റെ പങ്കാളിയായത്. ഭൂപതിക്കൊപ്പമാണ് സുഗമമായി കളിക്കാനാവുക എന്നതാണ് തന്റെ അനുഭവമെന്ന് ബൊപ്പണ്ണ തുടര്‍ന്നു.
താരങ്ങളും സംഘടനയും തമ്മിലുള്ള തര്‍ക്കത്തില്‍ വിശദീകരണം തേടി കായികമന്ത്രാലയം എ.ഐ.ടി.എക്ക് കത്തയച്ചിരിക്കുകയാണ്. രണ്ട് ടീമിനെത്തന്നെ അയക്കാന്‍ അവസരമുണ്ടെന്നതിനാല്‍ പേസിന് പങ്കാളിയായി മറ്റാരെയെങ്കിലും കണ്ടെത്തണമെന്ന്, ഭൂപതി-ബൊപ്പണ്ണ സഖ്യത്തെ കളിപ്പിക്കണമെന്ന് പരോക്ഷമായി സൂചിപ്പിച്ച്, മന്ത്രി മാക്കന്‍ നിര്‍ദേശിച്ചു. ഇയ്യിടെ നടന്ന ഫ്രഞ്ച് ഓപണ്‍ മിക്സഡ് ഡബ്ള്‍സില്‍ ജേതാക്കളായ ഭൂപതി-സാനിയ മിര്‍സ കൂട്ടുകെട്ടിനെ വേര്‍പിരിക്കുന്നതെന്തിനാണെന്ന് അദ്ദേഹം നേരത്തേ ട്വിറ്ററിലും ചോദിച്ചു.
പ്രശ്നത്തില്‍ ഇടപെടണമെന്ന് അഭ്യര്‍ഥിച്ച് ഭൂപതി മന്ത്രിക്ക് കത്തെഴുതിയിരുന്നു. ഒരുമിച്ച് ഇറങ്ങാനുള്ള തന്റെയും ബൊപ്പണ്ണയുടെയും ആഗ്രഹം തിരസ്കരിക്കുകയാണ് ടെന്നിസ് അസോസിയേഷന്‍. പേസിന് കൂട്ടാവാനില്ലെന്നും അദ്ദേഹം ആവര്‍ത്തിച്ചു. ഭൂപതിയും മാക്കനും ട്വിറ്റര്‍ സംഭാഷണവും നടത്തി.