ന്യൂദല്‍ഹി: ഫുട്ബാളിന് ഇന്ത്യയില്‍ ഏറെ ആരാധകരുണ്ടെന്നത് തന്നെ ആവേശഭരിതനാക്കുന്നുവെന്ന് ചെല്‍സിയുടെ ഐവറി കോസ്റ്റ് സ്ട്രൈക്കര്‍ ദിദിയര്‍ ദ്രോഗ്ബ. ഇന്ത്യന്‍ ഫുട്ബാളിനെയോ കളിക്കാരെയോ പറ്റി അറിയില്ല. എന്നാല്‍, ഇവിടത്തെ ദേശീയ ടീം കളിക്കുന്നത് കണ്ടിട്ടുണ്ടെന്നും ഒരു പരിപാടിയില്‍ പങ്കെടുക്കാനായി ദല്‍ഹിയിലെത്തിയ അദ്ദേഹം വാര്‍ത്താ സമ്മേളനത്തില്‍ പറഞ്ഞു.
ഇന്ത്യന്‍ ക്രിക്കറ്റ് ടീം നായകന്റെ പേര് (എം.എസ്. ധോണി) തനിക്ക് ഉച്ചരിക്കാനാവുന്നില്ലെങ്കിലും അദ്ദേഹം ഏറെ നേതൃഗുണമുള്ളയാളാണെന്നാണ് അഭിപ്രായം. കഴിഞ്ഞ ക്രിക്കറ്റ ്ലോകകപ്പ് വീക്ഷിച്ചിരുന്നു. ഇന്ത്യ ലോക ചാമ്പ്യന്മാരാണെന്നറിയാം. ഇംഗ്ളണ്ടിലുള്ളവരെല്ലാം ഇവിടത്തെ ക്രിക്കറ്റര്‍മാരെക്കുറിച്ച് സംസാരിക്കുന്നതിനര്‍ഥം അവര്‍ മികവുറ്റ താരങ്ങളാണെന്നാണ്. -ദ്രോഗ്ബ പറഞ്ഞു.
ക്രിക്കറ്റ് ഫുട്ബാളിനെ അപേക്ഷിച്ച് ചെറുതാണെന്ന് അഭിപ്രായമില്ല. എല്ലാ കായിക ഇനങ്ങളെയും മാനിക്കുന്നു. ദശലക്ഷക്കണക്കിന് ജനങ്ങളെ പ്രതിനിധാനം ചെയ്താണ് ഇന്ത്യന്‍ ക്രിക്കറ്റ് താരങ്ങള്‍ കളത്തിലിറങ്ങുന്നതെന്നും ചാമ്പ്യന്‍സ് ലീഗില്‍ ചെല്‍സിയുടെ വിജയശില്‍പിയായ 34 കാരന്‍ ചൂണ്ടിക്കാട്ടി.