ലണ്ടന്: ഇംഗ്ളണ്ടിലെ വെസ്റ്റ് മിഡ്ലന്ഡ് തെല്ഫോര്ഡിലെ 15കാരി സ്റ്റേസി കോമര്ഫോഡ് ഒന്നുറങ്ങിയുണര്ന്നതിനിടെയില് കഴിഞ്ഞുപോയത് സ്കൂളിലെ പരീക്ഷയും സ്വന്തം ജന്മദിനാഘോഷവും.
ഏപ്രിലില് തുടങ്ങിയ ഉറക്കത്തില്നിന്ന് ഉണര്ന്നത് കഴിഞ്ഞയാഴ്ച. അപൂര്വമായ നാഡീവ്യൂഹ തകരാറാണ് രണ്ടുമാസം നീണ്ട ഉറക്കത്തിന് കാരണമായതെന്ന് 'ദി സണ്' പത്രം റിപ്പോര്ട്ട് ചെയ്തു. 'സ്ലീപ്പിങ് ബ്യൂട്ടി സിന്ഡ്രോം' എന്ന് വിശേഷിപ്പിക്കുന്ന 'ക്ളീനെ ലെവിന് സിന്ഡ്രോം' എന്ന അസുഖമാണ് സ്റ്റേസിക്ക് പിടിപെട്ടത്. ലോകത്ത് 1000ല് ഒരാള്ക്കാണ് ഈ അസുഖം പിടിപെടുക.
രണ്ടുമാസം നീണ്ട കഴിഞ്ഞ ഉറക്ക കാലയളവിനിടെ ഒമ്പത് പരീക്ഷകള് പെണ്കുട്ടിക്ക് നഷ്ടമായി.
20 മണിക്കൂര്വരെ ഒരുദിനത്തില് കുട്ടി ഉറങ്ങുമെന്ന് മാതാവ് ബേര്ണി റിച്ചാര്ഡ്സ് പറയുന്നു. 'പിന്നെ പാതിയുറക്കത്തിലാണ് ടോയ്ലറ്റില് പോകുന്നതും എന്തെങ്കിലും വെള്ളം കുടിക്കുന്നതും. ഒരുവട്ടം അടുക്കളയിലെ തറയില് വീണും ഉറങ്ങിപ്പോയി. ഇക്കുറി ദിവസത്തില് പാതിയുറക്കത്തിനിടെ അല്പം ഭക്ഷണം നല്കാനായി. ഈസമയം അഞ്ചുവയസ്സുകാരിയുടെ സ്വഭാവമാണ് മകള്ക്ക്. എല്ലാത്തിനും വാശിയും കാണിക്കും' -അവര് പറയുന്നു. സ്റ്റേസി ഉള്പ്പെടെ ആറു മക്കളാണ് ഇവര്ക്ക്.
ഒരുവര്ഷം മുമ്പാണ് അസുഖം കുട്ടിയില് കണ്ടുതുടങ്ങിയത്. 30 ശതമാനം ഹാജരാണ് സ്കൂളില് ഇതുവരെ ലഭിച്ചിട്ടുള്ളൂ.
സ്കൂളിലേക്ക് തിരികെ പോകാനാകുമെന്ന് കരുതുന്ന സ്റ്റേസി തന്റെ നീണ്ട ഉറക്കത്തിന്റെ പേരില് ശകാരം കേള്ക്കേണ്ടി വരുമോയെന്ന പേടിയിലുമാണ്. 'ജന്മദിനവും പരീക്ഷകളും എനിക്ക് നഷ്ടമായി. ഇപ്പോള് എന്റെ ഉറക്കത്തിന്റെ കാര്യം പറഞ്ഞാല് ആളുകള്ക്ക് മനസ്സിലാകും. മുമ്പ് ഈ അസുഖത്തെപ്പറ്റി പറഞ്ഞാല് ആരും വിശ്വസിച്ചിരുന്നില്ല. അതായിരുന്നു ഏറെ കഷ്ടം' -സ്റ്റേസി പറയുന്നു.
നിങ്ങളുടെ അഭിപ്രായങ്ങള്