വാഴ്സോ: യൂറോകപ്പില്‍ ക്വാര്‍ട്ടറിലെത്തുന്ന ആദ്യടീമാകാനുള്ള അവസരം റഷ്യ കളഞ്ഞുകുളിച്ചു. സഹആതിഥേയരായ പോളണ്ടിനെതിരെ ലീഡ് നേടിയശേഷം ചെമ്പട 1-1ന് സമനില വഴങ്ങി. 37ാം മിനിറ്റില്‍ അലന്‍ സഗോയേവിലൂടെ മുന്നിലെത്തിയ റഷ്യക്കെതിരെ 57ാം മിനിറ്റില്‍ ക്യാപ്റ്റന്‍ യാകൂബ് ബ്ലസികോവ്സ്കിയാണ് പോളിഷ് ടീമിനുവേണ്ടി സമനില കണ്ടത്. രണ്ടു കളിയില്‍ നാലു പോയന്റുമായി റഷ്യ ഒന്നാമതും മൂന്നു പോയന്റുാമയി ചെക് റിപ്പബ്ലിക് രണ്ടാമതുമാണ്. പോളണ്ടിന് രണ്ടു പോയന്റുണ്ട്.
തുടക്കം മുതല്‍ ആക്രമിച്ചു കളിക്കാന്‍ പദ്ധതിയിട്ട് ഇരുനിരയും കളത്തിലിറങ്ങിയതോടെ പന്ത് ഇരുഗോള്‍മുഖത്തേക്കും കയറിയിറങ്ങി. ഏഴാം മിനിറ്റില്‍ ലെവന്‍ഡോവ്സ്കിയുടെ ക്രോസില്‍ ബോസ്നീച്ചിന്റെ ശ്രമം റഷ്യന്‍ ഗോളി മലാഫീവ് അത്യുജ്ജ്വലമായാണ് തടഞ്ഞിട്ടത്. അടുത്ത മിനിറ്റില്‍ ബോസ്നീച്ചിന്റെ ഹെഡറും മലാഫീവ് വായുവില്‍ പറന്ന് പ്രതിരോധിച്ചു. ഇതിനു ബദലായി അര്‍ഷാവിന്‍ തൊടുത്ത കോര്‍ണര്‍ കിക്ക് പ്രൊമിസ്ലാവ് ടൈറ്റണും തട്ടിയകറ്റി.
18ാം മിനിറ്റില്‍ ഗാലറിയെ ഹരം കൊള്ളിച്ച് പൊളാന്‍സ്കി റഷ്യന്‍ വലയില്‍ പന്തെത്തിച്ചെങ്കിലും ലൈന്‍സ്മാന്റെ ഓഫ്സൈഡ് ഫ്ളാഗ് ആ ആവേശം കെടുത്തി. പിന്നീട് ഇരുനിരയും ജാഗ്രതയോടെ കളി നയിക്കുന്നതിനിടെ 37ാം മിനിറ്റില്‍ സഗോയേവ് ടൂര്‍ണമെന്റിലെ തന്റെ മൂന്നാം ഗോളിലേക്ക് ഹെഡറുതിര്‍ത്തു. യൂറി സിര്‍കോവിനെ മാര്‍സിന്‍ വസിലേവ്സ്കി വീഴ്ത്തിയതിന് ലഭിച്ച ഫ്രീകിക്ക് എടുത്തത് ക്യാപ്റ്റന്‍ അര്‍ഷാവിന്‍. പന്ത് ബോക്സിലേക്ക് ഒഴുകിയിറങ്ങവേ 21കാരന്‍ തലകൊണ്ട് വലയുടെ മൂലയിലേക്ക് തട്ടിനീക്കിയതോടെ ആതിഥേയകാണികള്‍ അസ്തപ്രജ്ഞരായി.
രണ്ടാം പകുതിയില്‍ രണ്ടും കല്‍പിച്ചുള്ള പോളിഷ് നീക്കങ്ങളായിരുന്നു. 57ാം മിനിറ്റില്‍ അതിന് ഫലവും കണ്ടു. ലുഡോവിക് ഒബ്റാനിയാകുമൊത്തുള്ള നീക്കത്തിനൊടുവില്‍ ബ്ലസികോവ്സ്കി ബോക്സിന് തൊട്ടുപുറത്തുനിന്ന് തൊടുത്ത മനോഹരഷോട്ട് വലയുടെ ഓരം ചേര്‍ന്ന് കയറിയപ്പോള്‍ നാഷനല്‍ സ്റ്റേഡിയം ആരവങ്ങളില്‍ മുങ്ങി. പിന്നീട് വിജയഗോള്‍ നേടാനുള്ള ഇരുനിരയുടെയും ശ്രമങ്ങള്‍ പാഴായതോടെ ഗ്രൂപ് 'എ'യില്‍നിന്ന് ക്വാര്‍ട്ടറിലെത്താന്‍ റഷ്യക്ക് അവസാന മത്സരം വരെ കാത്തിരിക്കേണ്ടി വന്നു.