ബാങ്കോക്ക്: തായ് ലന്റ് ഓപണ്‍ ഗ്രാന്‍ഡ് പ്രീ ഗോള്‍ഡ് ബാഡ്മിന്റണ്‍ ടൂര്‍ണമെന്റില്‍ ഇന്ത്യയുടെ സൈനാ നെഹ്വാളിന്റെ ജൈത്രയാത്രക്ക് ശുഭപര്യവസാനം. വനിതാ സിംഗ്ള്‍സ് ഫൈനലില്‍ രണ്ടാം സീഡ് ആതിഥേയതാരം റചാനോക് ഇന്‍താനോണിനെ വീഴ്ത്തിയ 22 കാരി ഇതാദ്യമായി തായ്ലന്‍ഡ് ഓപണ്‍ കിരീടം സ്വന്തമാക്കി. സ്കോര്‍: 19-21, 21-15, 21-10.
ഒരു സെറ്റ് പിറകില്‍നിന്ന ശേഷമാണ് ഇന്ത്യന്‍ താരം ഉജ്ജ്വല തിരിച്ചുവരവിലൂടെ കിരീടം സ്വന്തമാക്കിയത്. ഇഞ്ചോടിഞ്ചായിരുന്ന ആദ്യ സെറ്റിലെ അവസാന ചിരി 17കാരിയായ ഇന്‍താനോണിന്റേതായിരുന്നു. എന്നാല്‍, തുടര്‍ന്ന് എതിരാളിക്ക് കാര്യമായ അവസരങ്ങള്‍ നല്‍കാതെ സൈന വിജയം സ്വന്തമാക്കി. ടൂര്‍ണമെന്റില്‍ ടോപ് സീഡായിരുന്നു അവര്‍.
ലോക അഞ്ചാം നമ്പര്‍ താരമായ സൈനയുടെ ഈ വര്‍ഷത്തെ രണ്ടാം കിരീടമാണിത്. മാര്‍ച്ചില്‍ നടന്ന സ്വിസ് ഓപണിലും ജേതാവായിരുന്നു. തായ് ലന്റിലെ തിളക്കമാര്‍ന്ന വിജയം താരത്തിന്റെ ഒളിമ്പിക്സ് പ്രതീക്ഷകള്‍ സജീവമാക്കി. ലണ്ടനില്‍ കായിക മാമാങ്കം നടക്കാന്‍ ഒരു മാസം മാത്രം ശേഷിക്കെ അടുത്തയാഴ്ച ഇന്തോനേഷ്യന്‍ ഓപണിലും ഹരിയാനക്കാരി ഇറങ്ങുന്നുണ്ട്. കളിയെ ശാന്തമായി സമീപിച്ചതും ക്ഷമയുമാണ് വിജയത്തിന് പിന്നിലെന്ന് സൈന പ്രതികരിച്ചു. ഒളിമ്പിക്സ് പടിവാതിലില്‍ നില്‍ക്കെ ലഭിച്ച നേട്ടം താരത്തിന്റെ ആത്മവിശ്വാസം ഇരട്ടിയാക്കുമെന്ന് കോച്ച് പുല്ലേല ഗോപീചന്ദ് പറഞ്ഞു.