പാരിസ്: ഫ്രഞ്ച് ഓപണ്‍ ടെന്നിസ് ടൂര്‍ണമെന്‍റില്‍ ഇറ്റലിയുടെ സാറ ഇറാനിയും ആസ്ട്രേലിയന്‍ താരം സാമന്ത സ്റ്റോസറും സെമിഫൈനലില്‍ പ്രവേശിച്ചു. വനിതാ സിംഗിള്‍സ് ക്വാര്‍ട്ടര്‍ ഫൈനലില്‍ യഥാക്രമം ജര്‍മനിയുടെ ആന്‍ജലികെ കെര്‍ബറെയും സ്ലോവാക്യന്‍ താരം ഡൊമിനിക സിബുല്‍കോവയെയുമാണ് വീഴ്ത്തിയത്. സെമിയില്‍ ഇറാനിയും സ്റ്റോസറും തമ്മില്‍ ഏറ്റുമുട്ടും. അതേസമയം, ബ്രിട്ടന്‍െറ ആന്‍ഡി മറേയും സ്പാനിഷ് താരം റഫേല്‍ നദാലും പുരുഷ സിംഗിള്‍സ് ക്വാര്‍ട്ടറില്‍ കടന്നു.
10ാം സീഡായ കെര്‍ബറിനെതിരെ 6-3, 7-6 എന്ന സ്കോറിനായിരുന്നു സാറ ഇറാനിയുടെ വിജയം. താരത്തിന്‍െറ ആദ്യ ഗ്രാന്‍ഡ് സ്ളാം സെമി ഫൈനല്‍ ബെര്‍ത്താണിത്. പത്താം സീഡ് താരത്തിനെതിരെ ആദ്യ സെറ്റില്‍ ആധികാരിക ജയം സ്വന്തമാക്കിയ ഇറാനി രണ്ടാം സെറ്റില്‍ ഏറെ വിയര്‍പ്പൊഴുക്കിയാണ് മത്സരം പിടിച്ചെടുത്ത് കരിയറിലെ സുന്ദര മുഹൂര്‍ത്തം ആഘോഷിച്ചത്.
15ാം സീഡായ സിബുല്‍കോവക്കെതിരെ 6-4, 6-1നായിരുന്നു സാമന്ത സ്റ്റോസറുടെ ജയം. ആതിഥേയ താരവും 17ാം സീഡുമായ റിച്ചാര്‍ഡ് ഗാസ്കറ്റാണ് നാലാം സീഡായ മറേക്ക് മുന്നില്‍ വീണത്. സ്കോര്‍: 1-6, 6-4, 6-1, 6-2. രണ്ടാം സീഡുകാരനായ നദാല്‍ 13ാം സീഡ് അര്‍ജന്‍റീനയുടെ ജുവാന്‍ മൊണാകോയെ 6-2, 6-0, 6-0 എന്ന ദയനീയ നിലയില്‍ തറപറ്റിച്ച് അവസാന എട്ടില്‍ പ്രവേശിച്ചു.