ഹംബന്‍ടോട്ട: രണ്ടാം ട്വന്റി20 മത്സരം 23 റണ്‍സിന് ജയിച്ച പാകിസ്താന്‍ ശ്രീലങ്കക്കെതിരായ പരമ്പര (1-1) സമനിലയിലാക്കി. ആദ്യം ബാറ്റ് ചെയ്ത പാകിസ്താന്‍ നിശ്ചിത 20 ഓവറില്‍ ആറു വിക്കറ്റിന് 122 റണ്‍സെടുത്തു. ആതിഥേയരുടെ മറുപടി 19.2 ഓവറില്‍ 99 റണ്‍സില്‍ അവസാനിച്ചു. 33 പന്തില്‍ 52 റണ്‍സടിച്ച് ടോപ് സ്കോററാവുകയും നാല് ഓവറില്‍ 17 റണ്‍സ് വഴങ്ങി രണ്ടു വിക്കറ്റെടുക്കുകയും ചെയ്ത ഷാഹിദ് അഫ്രീദിയാണ് വിജയശില്‍പി. സുഹൈല്‍ തന്‍വീര്‍ മാന്‍ ഓഫ് ദ സീരീസായി.
ടോസ് നേടിയ സന്ദര്‍ശകര്‍ ബാറ്റിങ് തിരഞ്ഞെടുത്തു. ഓപണറും ക്യാപ്റ്റനുമായ മുഹമ്മദ് ഹഫീസ് (24), ശുഐബ് മാലിക് (27) എന്നിവരാണ് അഫ്രീദിക്ക് പുറമെ നിര്‍ണായക സംഭാവന നല്‍കിയത്. 19 റണ്‍സെടുത്ത ചമേര കപുഗെദേരയാണ് ലങ്കയുടെ ഉയര്‍ന്ന സ്കോറര്‍. പാക് ബൗളര്‍മാരില്‍ മൂന്നു വീതം വിക്കറ്റ് വീഴ്ത്തി യാസിര്‍ അറഫാത്തും മുഹമ്മദ് സമിയും മിന്നി.