ദോഹ: കോണ്‍ഫെഡറേഷന്‍ ഓഫ് അലുംനി അസോസിയേഷന്‍ ഓഫ് കേരള (കാക്) ഖത്തര്‍ സംഘടിപ്പിക്കുന്ന വിദ്യാഭ്യാസ സെമിനാറും സംഗീത സന്ധ്യയും മേയ് 31ന് വൈകീട്ട് ആറരക്ക് ഐ.സി.സി അശോക ഹാളില്‍ നടക്കും. ഇന്ത്യന്‍ അംബാസഡര്‍ ദീപാ ഗോപാലന്‍ വാധ്വ ഉദ്ഘാടനം ചെയ്യും. ‘ഉന്നത വിദ്യാഭ്യാസ സാധ്യതകള്‍ ഖത്തറിലും ഇന്ത്യയിലും’ എന്ന വിഷയത്തില്‍ നടക്കുന്ന സെമിനാറില്‍ ലന എ അസ്ഫര്‍ (ഹെഡ് ഓഫ് സ്റ്റുഡന്‍റ്സ് സര്‍വീസസ് ഖത്തര്‍ ഫൗണ്ടേഷന്‍), അഡ്വ. കെ കെ ഇസ്സുദ്ദീന്‍ (സിജി) തുടങ്ങിയവര്‍ പങ്കെടുക്കും.
മക്കളുടെ തുടര്‍ പഠനം സംബന്ധിച്ച് ആശയക്കുഴപ്പമുള്ള രക്ഷിതാക്കള്‍ക്കും വിവിധ കോഴ്സുകള്‍ സംബന്ധിച്ച് അന്വേഷിക്കുന്ന വിദ്യാര്‍ഥികള്‍ക്കും പ്രയോജനപ്പെടുന്ന രീതിയിലാണ് സെമിനാര്‍ ആസൂത്രണം ചെയ്തതെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ചടങ്ങില്‍ പിന്നണി ഗായകന്‍ പത്മകുമാറിന്‍െറ സംഗീത പരിപാടിയും നടക്കും. ഐ.സി.സി പ്രസിഡന്‍റ് തരുണ്‍ ബാസു പങ്കെടുക്കും. സിവില്‍ സര്‍വീസ് പരീക്ഷയില്‍ തെരഞ്ഞെടുക്കപ്പെട്ട അലുംനി കുടുംബങ്ങളിലുള്ളവരെ പരിപാടിയില്‍ ആദരിക്കും. കൂടുതല്‍ വിവരങ്ങള്‍ക്ക് 55811479, 55520749 നമ്പറുകളിലോ caakqatar@gmail.com എന്ന വിലാസത്തിലോ ബന്ധപ്പെടണം. പ്രസിഡന്‍റ് എ.പി മണികണ്ഠന്‍, ജനറല്‍ സെക്രട്ടറി മശ്ഹൂദ് തിരുത്തിയാട്, ട്രഷറര്‍ വി.കെ വര്‍ഗീസ്, പബ്ളിസിറ്റി കണ്‍വീനര്‍ സാം കുരുവിള, വൈസ് പ്രസിഡന്‍റ് മത്തായി ഫിലിപ്പ് തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു.