അബൂദബി: വടക്കന്‍ എമിറേറ്റുകളിലെ 74 ഇമാറാത്ത് പെട്രോള്‍ സ്റ്റേഷനുകള്‍ അഡ്നോക് ഏറ്റെടുത്തു. ഇതുസംബന്ധിച്ച ധാരണാപത്രത്തില്‍ ഇരു കമ്പനികളും ഒപ്പുവെച്ചു. ഇതിന്‍െറ അടിസ്ഥാനത്തില്‍ ഷാര്‍ജ, റാസല്‍ഖൈമ, അജ്മാന്‍, ഉമ്മുല്‍ഖുവൈന്‍, ഫുജൈറ എന്നിവിടങ്ങളില്‍ ഇമാറാത്തിന് കീഴിലുള്ള 74 പെട്രോള്‍ സ്റ്റേഷനുകള്‍ ഇനി അഡ്നോകിന് കീഴിലാണ് പ്രവര്‍ത്തിക്കുക.
അഡ്നോക് ജനറല്‍ മാനേജര്‍ അബ്ദുല്ല സാലിം അല്‍ ദാഹിരിയും ഇമാറാത്ത് ആക്ടിങ് ജനറല്‍ മാനേജര്‍ ആദില്‍ ഖലീഫ അല്‍ ശാഇറുമാണ് ധാരണാപത്രത്തില്‍ ഒപ്പുവെച്ചത്. സാമ്പത്തികകാര്യ സഹമന്ത്രിയും ഇമാറാത്ത് ചെയര്‍മാനുമായ ഉബൈദ് ഹുമൈദ് അല്‍ തായിര്‍, അഡ്നോക് ഡയറക്ടര്‍ ജനറല്‍ അബ്ദുല്ല നാസര്‍ അല്‍ സുവൈദി എന്നിവരുടെ സാന്നിധ്യത്തിലാണ് ചടങ്ങ് നടന്നത്. ധാരണാപത്രത്തിന്‍െറ അടിസ്ഥാനത്തില്‍ ഇരു കമ്പനികളും പരസ്പരം വിദഗ്ധരെ കൈമാറും. ‘ആഗോള തലത്തിലെ കടുത്ത മല്‍സരത്തിന്‍െറ പശ്ചാത്തലത്തില്‍ ഉപഭോക്താക്കള്‍ക്ക് ഏറ്റവും മികച്ച സേവനങ്ങളും സൗകര്യങ്ങളും നല്‍കാന്‍ ഈ ധാരണ സഹായിക്കും. രണ്ടു കമ്പനികളുടെയും വികസനത്തിനുള്ള തന്ത്രപ്രധാന പദ്ധതികള്‍ വിജയത്തിലെത്തിക്കാന്‍ സാധിക്കും. പ്രത്യേകിച്ച് പ്രാദേശിക വിപണിയില്‍ ചില്ലറ വില്‍പന മേഖലയിലെ വികസനത്തിന് സുപ്രധാന ചുവടുവെപ്പാണിത്’-അല്‍ ദാഹിരി പറഞ്ഞു. രണ്ടു കമ്പനികള്‍ക്കും ഗുണമുണ്ടാകുന്ന വിധത്തില്‍ മികച്ച ഉല്‍പന്നങ്ങളും സേവനങ്ങളും ലഭ്യമാക്കാന്‍ സാധിക്കുമെന്നും അദ്ദേഹം കൂട്ടിച്ചേര്‍ത്തു.