കട്ടക് (ഒഡീഷ): പിന്നിട്ടുനിന്ന ശേഷം പൊരുതിക്കയറിയ കേരളത്തിന് 66ാമത് സന്തോഷ് ട്രോഫി ഫുട്ബാള്‍ ചാമ്പ്യന്‍ഷിപ്പിന്‍െറ ക്വാര്‍ട്ടര്‍ ലീഗില്‍ അവസാന മിനിറ്റ് ഗോളിലൂടെ ആവേശോജ്ജ്വല ജയം. മുന്‍ ചാമ്പ്യന്മാരായ പഞ്ചാബിനെ ഒന്നിനെതിരെ രണ്ടു ഗോളുകള്‍ക്ക് കീഴടക്കിയാണ് ക്വാര്‍ട്ടര്‍ ലീഗ് ഗ്രൂപ് ‘എ’യില്‍ കേരളം സെമി പ്രതീക്ഷ സജീവമാക്കിയത്. ബരാബതി സ്റ്റേഡിയത്തില്‍ നടന്ന ആവേശകരമായ മത്സരത്തില്‍ ആദ്യപകുതിയില്‍ രോഹിതിലൂടെ മുന്നിലെത്തിയ പഞ്ചാബിനെതിരെ രണ്ടാം പകുതിയില്‍ ടി.സജിത്തും ഷിബിന്‍ ലാലുമാണ് കേരളത്തിന്‍െറ ഗോളുകള്‍ നേടിയത്. ജയത്തോടെ ഗ്രൂപ്പില്‍ മഹാരാഷ്ട്രക്കൊപ്പം ഒന്നാം സ്ഥാനത്താണ് കേരളം. ഞായറാഴ്ച കരുത്തരായ ബംഗാളിനെതിരെയാണ് കേരളത്തിന്‍െറ രണ്ടാം മത്സരം.
ക്ളസ്റ്റര്‍ രണ്ടില്‍ ത്രിപുരയെയും ഹിമാചല്‍ പ്രദേശിനെയും എതിരില്ലാത്ത നാലു ഗോളുകള്‍ക്ക് കീഴടക്കിയ കേരളം പഞ്ചാബിനെതിരെ മികച്ച കളിയാണ് പുറത്തെടുത്തത്. പ്രീക്വാര്‍ട്ടര്‍ തലം മുതല്‍ കളിച്ചുമുന്നേറിയ കേരളം കൂടുതല്‍ ഒത്തിണക്കം കാട്ടിയപ്പോള്‍ നേരിട്ട് ക്വാര്‍ട്ടര്‍ ലീഗില്‍ കളിക്കാനിറങ്ങിയ പഞ്ചാബ് ആദ്യപകുതിയില്‍ ഒപ്പത്തിനൊപ്പം പിടിച്ചു. കളി ചൂടുപിടിക്കവേ കേരളത്തിന്‍െറ ഗോള്‍ ഏരിയയിലേക്ക് കട്ടുചെയ്തു കയറി ബോക്സിനു തൊട്ടുപുറത്തുനിന്ന് രോഹിത് തൊടുത്ത ലോങ് റേഞ്ചര്‍ കേരള ക്യാപ്റ്റന്‍ കൂടിയായ ഗോളി ജോബി ജോസഫിന് അവസരമൊന്നും നല്‍കിയില്ല.
രണ്ടാം പകുതിയില്‍ കൂടുതല്‍ മേധാവിത്വം കാട്ടിയ കേരളം അവസരങ്ങള്‍ തുറന്നെടുക്കുന്നതിലും മിടുക്കുകാട്ടി. പഞ്ചാബ് ഗോള്‍മുഖം റെയ്ഡ് ചെയ്ത ഇത്തരമൊരു അവസരത്തില്‍ വലതു വിങ്ങില്‍നിന്ന് മുഹമ്മദ് റാസി തൊടുത്ത ക്രോസില്‍ ഒന്നാന്തരം ഹെഡറുതിര്‍ത്താണ് സജിത്ത് ടീമിന് സമനില നേടിക്കൊടുത്തത്. തുല്യത നേടിയ ആവേശത്തില്‍ ആക്രമണം കനപ്പിച്ച കേരളം ഏതുനിമിഷവും ഗോള്‍ നേടുമെന്ന പ്രതീതി സൃഷ്ടിച്ചെങ്കിലും ലക്ഷ്യം കാണാന്‍ 90ാം മിനിറ്റ് വരെ കാത്തിരിക്കേണ്ടി വന്നു. ഫിറോസില്‍നിന്ന് വിനീത് വഴി ലഭിച്ച പാസില്‍ മനോഹരമായ പ്ളേസിങ് ഷോട്ടുതിര്‍ത്താണ് ഷിബിന്‍ലാല്‍ കേരളത്തിന് വിലപ്പെട്ട മൂന്നു പോയന്‍റ് നേടിക്കൊടുത്തത്.