ക്വിന്‍ഹുവാങ്ദാവോ (ചൈന): എം.സി. മേരി കോമിനെ ഭാഗ്യം തുണച്ചു. ലോക ചാമ്പ്യന്‍ഷിപ്പിന്‍െറ ക്വാര്‍ട്ടര്‍ ഫൈനലില്‍ പുറത്തായിട്ടും ഇന്ത്യന്‍ വനിതാ ബോക്സറെത്തേടി ഒളിമ്പിക് ടിക്കറ്റെത്തി. വെള്ളിയാഴ്ച നടന്ന സെമി ഫൈനലില്‍ ഇംഗ്ളീഷ് താരം നികോള ആഡംസ് റഷ്യയുടെ എലേന സവേല്‍യെവയെ പരാജയപ്പെടുത്തുമ്പോള്‍ മണിപ്പൂര്‍ സ്വദേശിനിയായ 29 കാരിക്ക് ലണ്ടനിലേക്ക് വഴി തുറക്കുകയായിരുന്നു. 51 കി.ഗ്രാം ഇനത്തില്‍ പങ്കെടുക്കുന്ന മേരി ഒളിമ്പിക്സിന് യോഗ്യത നേടിയിരിക്കുന്ന ഏക ഇന്ത്യന്‍ വനിതാ ബോക്സറാണ്. വനിതാ ബോക്സിങ്ങിന്‍െറ അരങ്ങേറ്റമാണ് ഇക്കുറി ലണ്ടനില്‍ നടക്കുന്നത്.
ഏഷ്യന്‍ ക്വാട്ടയില്‍ രണ്ട് പേര്‍ക്കായിരുന്നു പ്രവേശം. ലാക ചാമ്പ്യന്‍ഷിപ്പില്‍ ഫൈനലിലെത്തിയിരിക്കുന്ന ഏഷ്യന്‍ ഗെയിംസ് ജേതാവ് ചൈനയുടെ റെന്‍ കാന്‍കന്‍ ഇതിനകം യോഗ്യത നേടി. ശേഷിച്ച ഒരു ടിക്കറ്റിനു വേണ്ടി മേരി കോമും ഉത്തര കൊറിയയുടെ ഹൈ കിമ്മും തമ്മിലായിരുന്നു മത്സരം. എന്നാല്‍, ഇരുവരും ക്വാര്‍ട്ടറില്‍ തോറ്റു. മേരിയെ നിക്കോളയും ഹൈ കിമ്മിനെ എലേനയുമാണ് വീഴ്ത്തിയത്. ഇതോടെ രണ്ട് ഏഷ്യന്‍ താരങ്ങളും യോഗ്യതക്കായി സെമി ഫൈനല്‍ ഫലത്തെ ആശ്രയിക്കുകയായിരുന്നു. നിക്കോള 11-6ന് എലേനയെ മുട്ടുകുത്തിച്ചത് മേരിക്ക് തുണയായി.
ഒളിമ്പിക്സ് യോഗ്യത ഉറപ്പായതില്‍ സന്തോഷമുണ്ടെന്ന് രണ്ട് കുട്ടികളുടെ മാതാവ് കൂടിയായ മേരി പ്രതികരിച്ചു. എന്നാല്‍, ലോകചാമ്പ്യന്‍ഷിപ്പില്‍ മെഡല്‍ ലഭിക്കാത്തതില്‍ നിരാശയാണെന്ന് അവര്‍ കൂട്ടിച്ചേര്‍ത്തു. അഞ്ചുതവണ ലോക ജേതാവായിട്ടുണ്ട് മേരി കോം. 51, 60, 75 കി.ഗ്രാം ഇനങ്ങളിലാണ് വനിതാ ബോക്സിങ് ഒളിമ്പിക്സില്‍ അരങ്ങേറുന്നത്.