ലണ്ടന്‍: ആവേശോജ്ജ്വലമായ പോരാട്ടങ്ങള്‍ക്കൊടുവില്‍ ഇംഗ്ളീഷ് പ്രീമിയര്‍ ലീഗ് കിരീടത്തില്‍ മുത്തമിട്ട ശേഷം നടത്തിയ വിജയാഹ്ളാദ പരേഡിനിടെ മാഞ്ചസ്റ്റര്‍ യുനൈറ്റഡ് കോച്ച് അലിക്സ് ഫെര്‍ഗൂസനെ ‘അപമാനിച്ചതിന്’ മാഞ്ചസ്റ്റര്‍ സിറ്റി ടീം അധികൃതര്‍ മാപ്പു പറഞ്ഞു. പരേഡിനിടെ അര്‍ജന്‍റീനിയന്‍ സ്ട്രൈക്കര്‍ കാര്‍ലോസ് ടെവസ് ഫെര്‍ഗൂസന് ‘നിത്യശാന്തി നേരുന്ന പ്ളക്കാര്‍ഡ് ഉയര്‍ത്തിപ്പിടിച്ചത് ടെലിവിഷന്‍ ചാനലുകള്‍ സംപ്രേഷണം ചെയ്തിരുന്നു. തുറന്ന വാഹനത്തില്‍ സഞ്ചരിക്കവെ ഒരു ആരാധകന്‍ നല്‍കിയ പ്ളക്കാര്‍ഡ് ടെവസ് ഉയര്‍ത്തിക്കാട്ടുകയായിരുന്നു. മുമ്പ് മാഞ്ചസ്റ്റര്‍ യുനൈറ്റഡ് താരമായിരുന്ന വേളയില്‍ ടെവസിന്‍െറ പരിശീലകനായിരുന്നു ഫെര്‍ഗൂസന്‍.
തന്‍െറ ജീവിതകാലത്ത് മാഞ്ചസ്റ്റര്‍ സിറ്റി, പ്രീമിയര്‍ ലീഗ് കിരീടത്തില്‍ മുത്തമിടില്ലെന്ന് ഫെര്‍ഗൂസന്‍ പരസ്യമായി പ്രസ്താവിച്ചിരുന്നു. ഇതുമായി ബന്ധപ്പെടുത്തിയാണ് ആരാധകന്‍ ഫെര്‍ഗൂസന് ‘നിത്യശാന്തി’ നേര്‍ന്നത്. പ്ളക്കാര്‍ഡ് ഉയര്‍ത്തിയത് ടെവസിന്‍െറ ഭാഗത്ത് സംബന്ധിച്ച പിഴവായിരുന്നുവെന്ന് പറഞ്ഞ സിറ്റി, ഇക്കാരണത്താല്‍ ഫെര്‍ഗൂസന്നേരിട്ട ബുദ്ധിമുട്ടില്‍ നിര്‍വ്യാജം ഖേദിക്കുന്നുവെന്നും വ്യക്താമക്കി. പ്ളക്കാര്‍ഡ് ഉയര്‍ത്താനിടയായതില്‍ ടെവസും ഫെര്‍ഗൂസനോട് മാപ്പുപറഞ്ഞു. ആ സമയത്തെ ആവേശത്തിനിടയില്‍ സംഭവിച്ചതാണ് അതെന്നും അലക്സ് ഫെര്‍ഗൂസനെ നിന്ദിക്കാന്‍ താന്‍ ഒരിക്കലും ഉദ്ദേശിച്ചിരുന്നില്ലെന്നും പറഞ്ഞ ടെവസ്, വ്യക്തി എന്ന നിലയിലും മാനേജരെന്ന നിലയിലും അദ്ദേഹത്തെ താന്‍ പ്രകീര്‍ത്തിക്കുന്നതായും വ്യക്തമാക്കി.