അഗളി: ഉപകാരമില്ലാത്ത പ്രവൃത്തികള്‍ സര്‍ക്കാര്‍ ചെലവില്‍ നടപ്പാക്കുകയാണെന്ന് ആരോപിച്ച് ചിറ്റൂരില്‍ നാട്ടുകാര്‍ തൊഴിലുറപ്പു പദ്ധതിയുടെ പണികള്‍ തടഞ്ഞു. അഗളി പഞ്ചായത്തിലെ ചിറ്റൂരില്‍ മൂന്ന് നൂറ്റാണ്ടിലേറെ കാലമായി ഉപേക്ഷിച്ച അട്ടപ്പാടി വാലി ഇറിഗേഷന്‍ പദ്ധതിയുടെ ഭൂമിയില്‍ കാട് വെട്ടിത്തെളിക്കാനെത്തിയ പണിക്കാരെയാണ് തടഞ്ഞത്. കഴിഞ്ഞ മൂന്ന് ദിവസമായി തുടരുന്ന പണികളാണ് തിങ്കളാഴ്ച രാവിലെ നാട്ടുകാരുടെ എതിര്‍പ്പിനെ തുടര്‍ന്ന് ഉപേക്ഷിച്ചത്. നാട്ടുകാരുടെ വികസന സ്വപ്നങ്ങള്‍ക്കുപോലും വിഘാതമായി കാടുകയറിക്കിടക്കുന്ന 700 ഏക്കറോളം ഭൂമിയാണ് പദ്ധതിക്കായി സര്‍ക്കാര്‍ ഏറ്റെടുത്തിട്ടുള്ളത്. കാടുകള്‍ വെട്ടിത്തെളിച്ച ശേഷവും വീണ്ടും പഴയ അവസ്ഥയില്‍ തന്നെ തുടരുന്ന പദ്ധതിക്കായി സര്‍ക്കാര്‍ ഫണ്ട് ചെലവഴിക്കാനനുവദിക്കില്ലെന്ന് നാട്ടുകാര്‍ പറഞ്ഞു.
എന്നാല്‍, കഴിഞ്ഞ സാമ്പത്തികവര്‍ഷത്തില്‍ ഗ്രാമസഭ അംഗീകരിച്ച പദ്ധതിയാണിതെന്നും നാട്ടുകാരുടെ എതിര്‍പ്പിനെ തുടര്‍ന്ന് റോഡിനിരുവശത്തെയും കാടുകള്‍ വെട്ടിത്തെളിക്കുമെന്നും അധികൃതര്‍ വ്യക്തമാക്കി.