മഡ്രിഡ്: കിരീടം തിരിച്ചുപിടിച്ച ആഘോഷങ്ങളിലേക്ക് നൂറു പോയന്‍റിന്‍െറ അലങ്കാരം ചാര്‍ത്തി റയല്‍ മഡ്രിഡിന്‍െറ വിസ്മയനേട്ടം. സ്പാനിഷ് ഫുട്ബാള്‍ ലീഗില്‍ ബദ്ധവൈരികളായ ബാഴ്സലോണയുടെ മേല്‍ക്കോയ്മ തകര്‍ത്ത് ആധികാരികതയോടെ കിരീടത്തില്‍ മുത്തമിട്ട റയല്‍ ഞായറാഴ്ച നടന്ന അവസാന മത്സരത്തില്‍ റയല്‍ മയ്യോര്‍ക്കയെ ഒന്നിനെതിരെ നാലു ഗോളുകള്‍ക്ക് കീഴടക്കി 38 മത്സരങ്ങളില്‍ നൂറു പോയന്‍െറന്ന മാന്ത്രിക സംഖ്യ തികച്ചു. സ്പാനിഷ് ലീഗില്‍ ഇതാദ്യമായാണ് ഒരു ടീം 100 പോയന്‍റ് സ്വന്തമാക്കുന്നത്. ക്രിസ്റ്റ്യാനോ റൊണാള്‍ഡോയുടെ ഗോളില്‍ മുന്നിലെത്തിയ റയല്‍ നിരയില്‍ മെസൂത് ഒസീല്‍ രണ്ടുതവണ വല കുലുക്കി. ഒരു ഗോള്‍ കരീം ബെന്‍സേമയുടെ വകയായിരുന്നു.
2010ല്‍ ബാഴ്സലോണ സ്വന്തമാക്കിയ 99 പോയന്‍റായിരുന്നു ലാ ലീഗയില്‍ ഇതുവരെയുള്ള റെക്കോഡ്. എന്നാല്‍, അതിനും മുകളിലേക്ക് ഗോളടിച്ചുകയറ്റിയ മഡ്രിഡുകാര്‍ കൊട്ടിക്കലാശം ഗംഭീരമാക്കി. 91 പോയന്‍റുമായി ബാഴ്സലോണ ഇത്തവണ രണ്ടാമതായപ്പോള്‍ മുന്നാം സ്ഥാനത്തുള്ള വലന്‍സിയക്ക് 61 പോയന്‍റാണുള്ളത്. 58 പോയന്‍റു നേടിയ മലാഗ ചാമ്പ്യന്‍സ് ലീഗില്‍ കളിക്കാന്‍ ഇടം നേടിയെടുത്തപ്പോള്‍ യൂറോപ ലീഗ് ചാമ്പ്യന്മാരായ അത്ലറ്റികോ മഡ്രിഡ് 56 പോയന്‍േറാടെ അഞ്ചും ലെവന്‍െറ 55 പോയന്‍റുമായി ആറും സ്ഥാനം നേടി. ഗോള്‍വേട്ടയില്‍ നേരത്തേ റെക്കോഡിട്ട റയല്‍ 38 കളികളില്‍ 121 ഗോളുകളുമായാണ് പടയോട്ടം അവസാനിപ്പിച്ചത്. സ്പാനിഷ് ലീഗില്‍ 46 ഗോളുമായി ഗോള്‍വേട്ടയില്‍ ക്രിസ്റ്റ്യാനോ രണ്ടാംസ്ഥാനം നേടി. സീസണില്‍ എല്ലാ മത്സരങ്ങളില്‍നിന്നുമായി 60 ഗോളുകളാണ് റൊണാള്‍ഡോയുടെ സമ്പാദ്യം. ‘കിരീടങ്ങളുടെ സമ്പന്നതയില്‍ ഫുട്ബാള്‍ ചരിത്രത്തിലെ ഏറ്റവും മികച്ച ടീമായ റയല്‍ മഡ്രിഡ്, 100 പോയന്‍റു നേടി പുതിയ ചരിത്രം കുറിച്ചിരിക്കുന്നു’ -സീസണില്‍ 32ാം ജയം നേടി 32ാം ലീഗ് കിരീടം സ്വന്തമാക്കിയ ആഘോഷങ്ങള്‍ക്കിടെ നിറഗാലറിയെ അഭിവാദ്യംചെയ്ത് റയല്‍ കോച്ച് ജോസ് മൗറിന്യോ പറഞ്ഞു.
19ാം മിനിറ്റില്‍ മാഴ്സലോയുടെ ക്രോസില്‍ റൊണാള്‍ഡോ ഹെഡറിലൂടെയാണ് റയലിന് ലീഡ് സമ്മാനിച്ചത്. നാലു മിനിറ്റിനുശേഷം ഏറെ പാസുകള്‍ കോര്‍ത്തിണക്കിയ നീക്കത്തിനൊടുവില്‍ ഗോണ്‍സാലോ ഹിഗ്വെ്ന്‍െറ സഹായത്താല്‍ ബെന്‍സേമ രണ്ടാം ഗോള്‍ നേടി. 49ാം മിനിറ്റില്‍ ഹിഗ്വെ്ന്‍െറ പാസില്‍നിന്നായിരുന്നു ഒസീലിന്‍െറ ആദ്യഗോള്‍. ചോറി കാസ്ട്രോ മൂന്നു മിനിറ്റിനകം ഒരു ഗോള്‍ മടക്കിയെങ്കിലും കളി ഒരു മണിക്കൂറാകവെ മാഴ്സലോയുടെ പാസില്‍നിന്ന് ഒസീല്‍ പട്ടിക തികച്ചു.