മൊഹാലി: ഒരു ഘട്ടത്തില്‍ അസാധ്യമെന്ന് തോന്നിച്ച വിജയലക്ഷ്യത്തിലേക്ക് ക്യാപ്റ്റന്‍ ഡേവിഡ് ഹസിയുടെ നേതൃത്വത്തില്‍ പഞ്ചാബ് കിങ്സ് ഇലവന്‍ താരങ്ങള്‍ ബാറ്റ് വീശിയപ്പോള്‍ ഐ.പി.എല്ലില്‍ ആവേശകരമായ മറ്റൊരു മത്സരഫലം. ഡെക്കാന്‍ ചാര്‍ജേഴ്സിനെ നാലു വിക്കറ്റിനാണ് തകര്‍ത്തത്. ടോസ് നേടി ബാറ്റ് ചെയ്ത സന്ദര്‍ശകര്‍ 20 ഓവറില്‍ നാലു വിക്കറ്റ് നഷ്ടത്തില്‍ 190 റണ്‍സെടുത്തു. അവസാന പന്തില്‍ ജയിക്കാന്‍ ഒരു റണ്‍സ് വേണ്ടിയിരുന്ന ആതിഥേയരെ ഗുര്‍കീരത് സിങ് ബൗണ്ടറിയിലൂടെ 194ലെത്തിച്ചു. 35 പന്തില്‍ 65 റണ്‍സുമായി ഹസിയും 12 പന്തില്‍ 29 റണ്‍സെടുത്ത് ഗുര്‍കീരതും പുറത്താവാതെ നിന്നു.
20ാം ഓവറില്‍ ജയിക്കാന്‍ 16 റണ്‍സ് ആവശ്യമായിരുന്ന ടീമിനുവേണ്ടി ഗുര്‍കീരതിന്റെ ബാറ്റില്‍നിന്ന് ഒരു സിക്സും രണ്ട് ബൗണ്ടറിയും പിറന്നു. നാല് ബൗണ്ടറിയും അഞ്ച് സിക്സുമടങ്ങുന്നതായിരുന്നു ഹസിയുടെ ഇന്നിങ്സ്. 20 പന്തില്‍ 31 റണ്‍സ് നേടിയ അസ്ഹര്‍ മഹ്മൂദും 20 പന്തില്‍ 28 റണ്‍സെടുത്ത മന്ദീപ് സിങ്ങും നിര്‍ണായക സംഭാവന നല്‍കി. നേരത്തേ, 50 പന്തില്‍ 71 റണ്‍സെടുത്ത ഓപണര്‍ ശിഖര്‍ ധവാനും പുറത്താവാതെ 41 പന്തില്‍ 67 റണ്‍സ് നേടിയ കാമറൂണ്‍ വൈറ്റുമാണ് ഡെക്കാനുവേണ്ടി തിളങ്ങിയത്. 10 പന്തില്‍ 24 റണ്‍സുമായി ഡാനിയല്‍ ക്രിസ്റ്റ്യനും മിന്നി.