മനാമ: ബഹ്റൈനിലെ സെക്യൂരിറ്റി സര്‍വീസ് കമ്പനിയില്‍ ഡ്രൈവറായിരുന്ന മലയാളി വാനിനുള്ളില്‍ ഹൃദയാഘാതം മൂലം നിര്യാതനായി. പാലക്കാട് ചിറ്റൂര്‍ കുന്നത്തുപാളയം തെക്കേ ഗ്രാമത്തില്‍ മണികണ്ഠന്‍ ഉണ്ണികൃഷ്ണനാണ് (44) മരിച്ചത്. ഇന്നലെ രാവിലെ ആറരയോടെ ഉമ്മുല്‍ഹസമിലെ കിംസ് ആശുപത്രിക്ക് മുന്നിലാണ് സംഭവം. മുഹമ്മദ് അഹ്മദി സെക്യൂരിറ്റി സര്‍വീസ് കമ്പനിയിലെ ഡ്രൈവറാണ്. ആശുപത്രിയില്‍ ഡ്യൂട്ടിയിലുണ്ടായിരുന്ന കമ്പനിയുടെ സെക്യൂരിറ്റി ജീവനക്കാരനെ കൊണ്ടുപോകാനാണ് മണികണ്ഠന്‍ രാവിലെ ആറരയോടെ ആശുപത്രിക്ക് മുന്നിലെത്തിയത്. 7.15ന് ജീവനക്കാരന്‍ വാഹനത്തില്‍ കയറാന്‍ വാതില്‍ തുറന്നപ്പോള്‍ മണികണ്ഠന്‍ വീണുകിടക്കുന്നതാണ് കണ്ടത്. ഉടനെ ആശുപത്രിയിലെ ഡോക്ടറെ വിളിച്ച് പരിശോധിച്ചപ്പോഴാണ് മരണം സ്ഥിരീകരിച്ചത്.
ഡോക്ടര്‍ പരിശോധിക്കുന്നതിന്‍െറ 10 മിനുട്ട് മുമ്പ് മരണം സംഭവിച്ചിരുന്നു. മണികണ്ഠന്‍ ഒരു വര്‍ഷമായി ഈ കമ്പനിയില്‍ എത്തിയിട്ട്. മൃതദേഹം സല്‍മാനിയ ആശുപത്രി മോര്‍ച്ചറിയിലാണുള്ളത്. ഇന്ന് നാട്ടിലേക്ക് കൊണ്ടുപോകും. കഴിഞ്ഞാഴ്ച നടന്ന മെഡിക്കല്‍ ക്യാമ്പില്‍ മണികണ്ഠന്‍ പരിശോധന നടത്തിയിരുന്നുവെങ്കിലും അസ്വാഭാവികമായി ഒന്നും കണ്ടിരുന്നില്ലെന്ന് കമ്പനി അധികൃതര്‍ പറഞ്ഞു. മണികണ്ഠന് നാട്ടില്‍ ഭാര്യയും കുട്ടിയുമുണ്ട്.