ദോഹ: ഡ്രൈവിംഗിനിടെ മൊബൈല് ഫോണില് സംസാരിക്കുന്നത് തടയാന് സഹായിക്കുന്ന ഉപകരണം വാഹനങ്ങള്ക്കുള്ളില് ഘടിപ്പിക്കുന്നതിനെക്കുറിച്ച് ബന്ധപ്പെട്ട അധികൃതരുമായി ഗൗരവമായി ആലോചിക്കുമെന്ന് സുപ്രീം ആരോഗ്യ കൗണ്സിലിലെ (എസ്.സി.എച്ച്) പൊതുജനാരോഗ്യ വിഭാഗം മേധാവി ഡോ. ശൈഖ് മുഹമ്മദ് ആല്ഥാനി പറഞ്ഞു. രാജ്യത്തുണ്ടാകുന്ന റോഡപകങ്ങളുടെ പ്രധാന കാരണങ്ങളിലൊന്ന് ഡ്രൈവിംഗിനിടയിലെ മൊബൈല് ഫോണ് ഉപയോഗമാണെന്നും ഇത് തടയാന് ശക്തമായ നടപടികള് ആവശ്യമാണെന്നും ‘അശ്ശര്ഖ്’ പത്രത്തിനനുവദിച്ച അഭിമുഖത്തില് അദ്ദേഹം പറഞ്ഞു.
തിരക്കേറിയ ഒരു റോഡില് അടുത്തിടെ നടത്തിയ പഠനത്തില് കണ്ടെത്തിയത് വാഹനം ഓടിക്കുന്നതിനിടെ ആയിരം ഡ്രൈവര്മാരില് 60 പേര് മൊബൈല് ഫോണ് ഉപയോഗിക്കുന്നു എന്നാണ്. ഇത് അതീവ ഗൗരവത്തോടെ കാണേണ്ട വിഷയമാണ്. ഡ്രൈവിംഗിനിടെ സന്ദേശങ്ങള് അയക്കുന്നതിന് ബ്ളാക്ക്ബെറി ഉപയോഗിക്കുന്ന പ്രവണതയെക്കുറിച്ചും പഠനം നടത്തും. മെഡിക്കല് കമീഷനില് നിര്ബന്ധിത വൈദ്യപരിശോധനക്കെത്തുന്ന പ്രവാസി തൊഴിലാളികള്ക്കായി റോഡ് സുരക്ഷയെക്കുറിച്ച് വിവിധ ഭാഷകളിലുള്ള ഹ്രസ്വചിത്രങ്ങള് പ്രദര്ശിപ്പിക്കുമെന്ന് മുഹമ്മദ് ആല്ഥാനി അറിയിച്ചു. റോഡ് മുറിച്ചുകടക്കുമ്പോള് ശ്രദ്ധിക്കേണ്ട കാര്യങ്ങളായിരിക്കും ഇത്തരം ചിത്രങ്ങളുടെ പ്രധാന ഉള്ളടക്കം. ഇതിനായി മെഡിക്കല് കമീഷന് പരിസരത്ത് കൂറ്റന് സ്ക്രീനുകള് സ്ഥാപിക്കും. തൊഴിലാളികള് അശ്രദ്ധമായി റോഡ് മുറിച്ചുകടക്കുന്നതാണ് പലപ്പോഴും അപകടം വരുത്തിവെക്കുന്നതെന്നാണ് പഠനങ്ങള് സൂചിപ്പിക്കുന്നത്. അശ്രദ്ധമായ ഡ്രൈവിംഗിനെക്കുറിച്ചുള്ള ചിത്രങ്ങളും പ്രദര്ശിപ്പിക്കും. ജോലിക്കായി ഖത്തറില് എത്തുമ്പോള് തന്നെ റോഡ് സുരക്ഷയെക്കുറിച്ച് പ്രവാസികളെ ബോധവത്കരിക്കുക എന്നതാണ് ഇതിന്െറ ലക്ഷ്യം. ഗതാഗത തടസ്സങ്ങളെക്കുറിച്ചും മോശം കാലാവസ്ഥയെക്കുറിച്ചും ഡ്രൈവര്മാര്ക്ക് എസ്.എം.എസ് വഴി മുന്കൂട്ടി വിവിരം നല്കുന്ന സംവിധാനം സമീപഭാവിയില് തന്നെ നടപ്പാക്കാന് ആലോചിക്കുന്നുണ്ട്. അത്തരം സ്ഥലങ്ങളിലേക്കുള്ള യാത്ര ഒഴിവാക്കി അപകടങ്ങള് കുറക്കാന് ഇത് സഹായിക്കും. അപകടസ്ഥലത്ത് ഉടന് എത്തിച്ചേരാന് അംബുലന്സ് ഡ്രൈവര്മാരെ സഹയിക്കുന്ന സാങ്കേതിക സംവിധാനം ഏര്പ്പെടുത്താനും പദ്ധതിയുണ്ട്. ഹമദ് മെഡിക്കല് കോര്പറേഷന്െറ ആംബുലന്സ് വിഭാഗവും ട്രാഫിക് വകുപ്പും ചേര്ന്നായിരിക്കും ഇതിനുള്ള നടപടികള് കൈക്കൊള്ളുക.
സെക്കന്ഡറി സ്കൂളുകളിലും സര്വകലാശാലാ തലത്തില് ആദ്യവര്ഷവും റോഡ് സുരക്ഷ പാഠ്യപദ്ധതിയില് ഉള്പ്പെടുത്തുന്നതിനുള്ള നടപടിക്രമങ്ങള് ഏറെക്കുറെ പൂര്ത്തിയായി. പതിനെട്ട് വയസ്സ് മാത്രം തികഞ്ഞ ധാരാളം യുവാക്കള് ലൈസന്സ് പോലുമില്ലാതെ കാര് ഓടിക്കുന്നതായി ശ്രദ്ധയില്പ്പെട്ടിട്ടുണ്ട്. അപകടരമായ ഇത്തരം പ്രവണതകള് ഒഴിവാക്കുന്നതിന് കടുത്ത പിഴ ഏര്പ്പെടുത്തുന്ന കാര്യവും അധികൃതരുടെ സജീവ പരിഗണനയിലുണ്ടെന്ന് മുഹമ്മദ് ആല്ഥാനി അറിയിച്ചു.
നിങ്ങളുടെ അഭിപ്രായങ്ങള്