ന്യൂദല്‍ഹി: നിരന്തരം വേട്ടയാടിയ പരിക്കും മറ്റും ജീവിതത്തില്‍ പ്രതിസന്ധികളുണ്ടാക്കിയപ്പോള്‍ സംഗീതമായിരുന്നു ആശ്രയമെന്ന് ആസ്ട്രേലിയന്‍ പേസ് ബൗളര്‍ ബ്രെറ്റ് ലീ. കരിയറിലും വ്യക്തിജീവിതത്തിലും പ്രശ്നങ്ങളുണ്ടായ വേളയില്‍ മുന്നിലുണ്ടായിരുന്ന ഏകമാര്‍ഗം മ്യൂസിക് തെറാപിയായിരുന്നുവെന്ന് അദ്ദേഹം പറഞ്ഞു. കുട്ടികള്‍ക്കുവേണ്ടി ലീ ആരംഭിച്ച സംഗീത അക്കാദമിയുടെ ഉദ്ഘാടനത്തിനിടെയാണ് താരം മനസ്സുതുറന്നത്.
17 വയസ്സായിരുന്നപ്പോള്‍ കൈമുട്ടിനേറ്റ പരിക്കുമായി ഡോക്ടറെ സമീപിച്ചു. തനിക്ക് ഒരിക്കലും ക്രിക്കറ്റ് കളിക്കാന്‍ കഴിയില്ലെന്നാണ് അദ്ദേഹം അറിയിച്ചത്. എന്നാല്‍, സ്വപ്നം യാഥാര്‍ഥ്യമാവുക തന്നെ ചെയ്യുമെന്ന് അന്ന് ഡോക്ടറോട് പറഞ്ഞു. തുടര്‍ന്ന് അന്താരാഷ്ട്ര ക്രിക്കറ്റിന്‍െറ ഭാഗമായി അദ്ദേഹത്തിന്‍െറ വാക്കുകള്‍ തെറ്റായിരുന്നുവെന്ന് തെളിയിച്ചു. ഇതിനൊക്കെ പ്രധാന ഉത്തേജനം സംഗീതമായിരുന്നുവെന്ന് ബ്രെറ്റ് ലീ വ്യക്തമാക്കി.
ഈഡന്‍ഗാര്‍ഡനിലെ ഒരുലക്ഷം കാണികള്‍ക്ക് മുന്നില്‍ കളിച്ച് നാട്ടില്‍ മടങ്ങിയെത്തുമ്പോള്‍ വലിയ ഏകാന്തത അനുഭവപ്പെടും. ഇത് മറികടക്കാനുള്ള മാര്‍ഗം സംഗീതം ആസ്വദിക്കലാണ്. സംഗീതത്തില്‍ പ്രത്യേക പരിശീലനമൊന്നും നേടിയിട്ടില്ലെങ്കിലും കുടുംബാംഗങ്ങളില്‍ ചിലര്‍ക്ക് അതുമായി വലിയ ബന്ധമുണ്ട്. തന്‍െറ ടീമായ കൊല്‍കത്ത നൈറ്റ് റൈഡേഴ്സിനെ നയിക്കുന്ന ഗൗതം ഗംഭീര്‍ സമര്‍ഥനായ ക്യാപ്റ്റനാണെന്നും ലീ അഭിപ്രായപ്പെട്ടു.
ഓട്ടിസം ബാധിച്ച കുട്ടികള്‍ക്കും അനാഥര്‍ക്കും വേണ്ടിയാണ് ‘മ്യൂസിക്, എ ബ്രെറ്റ്ലീ’ ഫൗണ്ടേഷന്‍ ആരംഭിച്ചിരിക്കുന്നത്.