ബാഴ്സലോണ: സ്കോറിങ് മികവിലേക്ക് ലയണല്‍ മെസ്സി തിരിച്ചെത്തിയപ്പോള്‍ സ്പാനിഷ് ലീഗ് ഫുട്ബാളില്‍ നിലവിലെ ചാമ്പ്യന്മാരായ ബാഴ്സലോണക്ക് അത്യുജ്ജ്വല ജയം. കിരീടപോരാട്ടത്തില്‍ റയലിനോട് തോല്‍വി സമ്മതിച്ച ബാഴ്സ ഞായറാഴ്ച നടന്ന കളിയില്‍ റയോ വായ്യെകാനോയെ അവരുടെ തട്ടകത്തില്‍ എതിരില്ലാത്ത ഏഴു ഗോളുകള്‍ക്കാണ് നിലംപരിശാക്കിയത്. മെസ്സിക്കു പുറമെ പെഡ്രോയും രണ്ടു തവണ ലക്ഷ്യം കണ്ടു. സെവിയ്യയെ 3-0ത്തിന് തോല്‍പിച്ച് 35 കളികളില്‍ 91 പോയന്‍റുമായി കിരീടം ഏറക്കുറെ ഉറപ്പിച്ച റയല്‍ മഡ്രിഡിന് പിന്നില്‍ 84 പോയന്‍റാണ് ബാഴ്സലോണയുടെ സമ്പാദ്യം.
സ്പാനിഷ് ലീഗില്‍ റയലിനെതിരെ എല്‍ ക്ളാസിക്കോയിലും ചെല്‍സിക്കെതിരെ ചാമ്പ്യന്‍സ് ലീഗ് സെമിയിലും കനത്ത തിരിച്ചടി നേരിട്ട ബാഴ്സക്ക് മുഖം രക്ഷിക്കാന്‍ മികച്ച ജയം അനിവാര്യമായിരുന്നു. അലക്സി സാഞ്ചസിന്‍െറ തകര്‍പ്പന്‍ ഡയഗണല്‍ പാസ് സ്വീകരിച്ച് പെഡ്രോ ഒരുക്കിയ അവസരം മുതലെടുത്ത് 16ാം മിനിറ്റില്‍ മെസ്സി തന്നെയാണ് ഗോള്‍വേട്ടക്ക് തുടക്കമിട്ടത്. 26ാം മിനിറ്റില്‍ സാഞ്ചസിന്‍െറ ആംഗുലര്‍ ഷോട്ട് സ്വന്തം വലയിലേക്ക് വഴിതിരിച്ച് റോബര്‍ട്ടോ കൊറീയ സെല്‍ഫ് ഗോള്‍ നേടി. 39ാം മിനിറ്റില്‍ മെസ്സിയുടെ പാസില്‍ സെയ്ദു കീത്തയും 47ാം മിനിറ്റില്‍ സാഞ്ചസിന്‍െറ ഷോട്ട് ക്രോസ്ബാറില്‍ തട്ടി തിരിച്ചെത്തിയപ്പോള്‍ റീബൗണ്ടില്‍ പെഡ്രോയും വല കുലുക്കി.
കളി തീരാന്‍ 13 മിനിറ്റ് ശേഷിക്കേ ഡാനി ആവെസിന്‍െറ ക്രോസില്‍ ഹെഡറിലൂടെ തിയാഗോയും 10 മിനിറ്റിനുശേഷം മെസ്സി ഉയര്‍ത്തി നല്‍കിയ പാസില്‍ പെഡ്രോയും റയോക്ക് പ്രഹരമേല്‍പിച്ചു. അവസാന മിനിറ്റിലാണ് മെസ്സി രണ്ടാം ഗോള്‍ നേടി പട്ടിക തികച്ചത്.
മറ്റൊരു മത്സരത്തില്‍ മലാഗ ഏകപക്ഷീയമായ ഒരുഗോളിന് വലന്‍സിയയെ കീഴടക്കി എതിരാളികളുടെ മൂന്നാം സ്ഥാനത്തിന് ഭീഷണി ഉയര്‍ത്തി. ഇരുടീമിനും 55 പോയന്‍റ് വീതമാണുള്ളത്. മുര്‍സിയയെ 1-3ന് തോല്‍പിച്ച ലെവന്‍െറ 52 പോയന്‍റുമായി അഞ്ചാം സ്ഥാനത്തുണ്ട്.