റോം: ടീമിനുവേണ്ടി ആദ്യ ഗോള്‍ നേടിയ മാര്‍കോ ബൊറിയെല്ലോയിലൂടെ യുവന്റസ് ഇറ്റാലിയന്‍ സീരി എ കിരീടസാധ്യത ശക്തമാക്കി മുന്നോട്ട്. സിസേനയെ മറുപടിയില്ലാത്ത ഒരു ഗോളിന് തോല്‍പിച്ചാണ് എ.സി മിലാന്റെ വെല്ലുവിളിയെ മൂന്ന് പോയന്റ് അകലെ മാറ്റി നിര്‍ത്തി യുവന്റസ് കിരീടത്തിലേക്ക് മുന്നേറുന്നത്. മറ്റൊരു മത്സരത്തില്‍ എ.സി മിലാന്‍ ജെനോവയെ 1-0ത്തിന് തോല്‍പിച്ചു. ഇതോടെ യുവന്റസ് 34 കളിയില്‍നിന്ന് 74 പോയന്റുമായി ഒന്നാം സ്ഥാനത്ത് കുതിക്കുമ്പോള്‍ ഇത്രയും കളിയില്‍നിന്നുതന്നെ 71 പോയന്റുമായി എ.സി മിലാന്‍ രണ്ടാം സ്ഥാനത്താണ്. കളിയുടെ 78ാം മിനിറ്റിലായിരുന്നു ബൊറിയല്ലോ യുവന്റസിന്റെ വിജയഗോള്‍ സ്വന്തമാക്കിയത്. പെനാല്‍റ്റി പാഴാക്കിയ ആന്ദ്രേ പിര്‍ലോയുടെ വീഴ്ച പരിഹരിക്കുന്നതായിരുന്നു ബൊറിയല്ലോയുടെ ഗോള്‍.
പത്തു പേരിലേക്ക് ചുരുങ്ങിയ ജെനോവക്കെതിരെ 86ാം മിനിറ്റില്‍ കെവിന്‍ പ്രിന്‍സ് ബോടെങ്ങാണ് മിലാന്‍ ടീമിന്റെ വിജയഗോള്‍ നേടിയത്.
ചാമ്പ്യന്‍സ് ലീഗ് ബര്‍ത്തുറപ്പിക്കാന്‍ രംഗത്തുള്ള ഇന്റര്‍ മിലാന്‍ യുദിനീസിനെതിരെ തകര്‍പ്പന്‍ ജയം നേടി. വെസ്ലി സ്നൈഡറുടെ ഇരട്ടഗോള്‍ മികവില്‍ 3-1നാണ് ഇന്റര്‍ മിലാന്‍ ജയിച്ചത്. 34 കളിയില്‍ 52 പോയന്റുമായി ആറാം സ്ഥാനത്താണ് ഇന്റര്‍. മൂന്നാം സ്ഥാനത്തുള്ള ലാസിയോ നൊവാരക്കു മുന്നില്‍ തോല്‍വി വഴങ്ങിയപ്പോള്‍ (2-1), നാലാം സ്ഥാനത്തുള്ള നാപോളി 2-0ത്തിന് ലെക്കെയെ തോല്‍പിച്ചു. ആദ്യ മൂന്ന് സ്ഥാനങ്ങളിലെത്തുന്നവര്‍ക്കാണ് ചാമ്പ്യന്‍സ് ലീഗ് ടിക്കറ്റ്.