മനേസര്‍: അത്ലറ്റിക്സ് ഫെഡറേഷന്‍ ഓഫ് ഇന്ത്യ (എ.എഫ്.ഐ)ക്ക് പുതിയ ഭാരവാഹികളായി. ഇവരെ കണ്ടെത്താന്‍ തെരഞ്ഞെടുപ്പ് പ്രഖ്യാപിച്ചെങ്കിലും കൂടുതല്‍ സ്ഥാനാര്‍ഥികള്‍ നാമനിര്‍ദേശ പത്രിക സമര്‍പ്പിക്കാത്തതിനാല്‍ എല്ലാവരും എതിരില്ലാതെ തെരഞ്ഞെടുക്കപ്പെടുകയായിരുന്നു. ആദിലെ സുമാരിവാല പ്രസിഡന്റായും സി.കെ. വല്‍സന്‍ സെക്രട്ടറിയായും തെരഞ്ഞെടുക്കപ്പെട്ടു. സത്യനാരായണനാണ് ട്രഷര്‍.
എ.എഫ്.ഐ വാര്‍ഷിക ജനറല്‍ ബോഡിയുടെ ഒന്നാം ദിവസമായ ശനിയാഴ്ചയാണ് ഭാരവാഹികളെ തെരഞ്ഞെടുത്തത്. കോമണ്‍വെല്‍ത്ത് ഗെയിംസ് അഴിമതിയാരോപണവുമായി ബന്ധപ്പെട്ട് ജയിലിലായിരുന്ന മുന്‍ സെക്രട്ടറി ലളിത് ഭാനട്ട് ഭാരവാഹിത്വത്തിനായി ചരട്വലി നടത്തുന്നുവെന്ന അഭ്യൂഹങ്ങള്‍ക്കിടെയായിരുന്നു തെരഞ്ഞെടുപ്പ്. എന്നാല്‍, ഭാനട്ട് മത്സരിച്ചില്ല.
ഒളിമ്പ്യന്‍ ഗുര്‍ബച്ചന്‍ സിങ് റണ്‍ധാവയാണ് സെലക്ഷന്‍ കമ്മിറ്റി ചെയര്‍മാന്‍. ജ്യോതിര്‍മയി സിക്ദറിനെ വനിതാ കമ്മീഷന്‍ അധ്യക്ഷതയായും നിയമിച്ചു. എക്സിക്യൂട്ടിവ് കമ്മിറ്റിയില്‍ പി.ടി. ഉഷ, ഷൈനി വില്‍സണ്‍, ബഹദൂര്‍ സിങ്, ജെ.എസ്. സൈനി തുടങ്ങിയവരെ നാമനിര്‍ദേശം ചെയ്തു. ദല്‍ഹി ഹൈകോടതി റിട്ട. ജഡ്ജി ജസ്റ്റിസ് കെ.സി. കപൂറായിരുന്നു റിട്ടേണിങ് ഓഫിസര്‍. എസ്.കെ. മെന്‍ഡിറാത്തയും റോക്വ് ഡിയാനും കേന്ദ്ര സര്‍ക്കാറിന്റേതും കുല്‍ദീവ് പട്ക് ഉമ്മന്‍ ഒളിമ്പിക് അസോസിയേഷന്റെ നിരീക്ഷകരായെത്തി.