ബാസല്‍: ഇന്ത്യന്‍ താരം സൈന നെഹ്വാള്‍ സ്വിസ് ഓപണ്‍ ഗ്രാന്‍ഡ് പ്രീ ബാഡ്മിന്‍റണ്‍ ടൂര്‍ണമെന്‍റില്‍ കിരീടം നിലനിര്‍ത്തി. ഫൈനലില്‍ ചൈനയുടെ രണ്ടാം സീഡുകാരി ഷിസിയാന്‍ വാങ്ങിനെ നേരിട്ടുള്ള ഗെയിമുകള്‍ക്ക് തകര്‍ത്താണ് സൈനയുടെ കിരീട നേട്ടം. സ്കോര്‍: 21-19, 21-16. ലോക റാങ്കിങ്ങില്‍ മൂന്നാമതുള്ള വാങ്ങിനെതിരെ 48 മിനിറ്റിനകം സൈന ജയിച്ചുകയറി. സീസണില്‍ ഹൈദരാബാദുകാരിയുടെ ആദ്യ കിരീടനേട്ടമാണിത്.
ഫൈനലിലെ ആദ്യ ഗെയിമില്‍ 11-3ന് മുന്നിലെത്തിയ സൈനക്കെതിരെ പൊരുതിക്കയറിയ വാങ് പിന്നീട് 17-17ന് ഒപ്പമെത്തിയെങ്കിലും മനസ്സാന്നിധ്യം കൈവിടാതെ ഇന്ത്യക്കാരി വിജയം പിടിച്ചെടുത്തു. രണ്ടാം ഗെയിമില്‍ സൈന 3-0ത്തിന്‍െറ ലീഡ് നേടിയിരുന്നു. പക്ഷേ, ശക്തമായി തിരിച്ചുവന്ന വാങ് 11-8ന് മുന്നില്‍ കയറി. ഇടവേള കഴിഞ്ഞ് കോര്‍ട്ടിലെത്തിയ സൈന 15-15ന് ഒപ്പമെത്തിയശേഷം തുടരെ നാലുപോയന്‍റ് നേടി മത്സരഗതി തനിക്കനുകൂലമാക്കി.
ശനിയാഴ്ച 22 വയസ്സു പൂര്‍ത്തിയായ സൈന സെമിയില്‍ ജപ്പാന്‍െറ മിനാത്സു മിതാനിയെ 21-16, 21-18ന് കീഴടക്കിയാണ് ഫൈനലിലേക്ക് മുന്നേറിയത്.