ഗോവ ചലച്ചിത്രമേള സിനിമ പ്രവർത്തകർ ബഹിഷ്​കരിക്കണമെന്ന്​ ഷബാന ആസ്​മി

ന്യൂഡൽഹി: സഞ്​ജയ് ലീല ​ബൻസാലി ചിത്രം ‘പത്മാവതി’യിൽ പുകഞ്ഞ്​ സിനിമാലോകം. പത്​​മാവതിക്കെതിരെ നടക്കുന്ന അസഹിഷ്​ണുതയിൽ പ്രതിഷേധിച്ച്​ ഗോവയിൽ നടക്കുന്ന ലോക സിനിമാമേള (​െഎ.എഫ്​.എഫ്​.​െഎ) സിനിമ പ്രവർത്തകർ ബഹിഷ്​കരിക്കണമെന്ന്​ നടിയും ആക്​ടിവിസ്​റ്റുമായ ശബാന ആസ്​മി ആവ​ശ്യപ്പെട്ടു. സർട്ടിഫിക്കേഷനു വേണ്ടി നിർമാതാക്കൾ സമർപ്പിച്ച ​അപേക്ഷ അപൂർണമാണെന്ന്​ കാണിച്ച്​ സെൻസർബോർഡ്​ തിരിച്ചയച്ചതിനെയും അവർ വിമർശിച്ചു. 

അതേസമയം, പത്മാവതി വിവാദം തണുപ്പിക്കുന്നതിനുവേണ്ടി രജ്​പുത്ര നേതാക്കൾക്ക്​ സ്വകാര്യ പ്രദർശനം നടത്താനുള്ള തീരുമാനത്തിനെതിരെ സെൻസർ ബോർഡ്​ രംഗത്തുവന്നു. അനുമതി ലഭിക്കാത്ത ഒരു സിനിമ സ്വകാര്യ പ്രദർശനം നടത്തുന്നത്​ അംഗീകരിക്കാനാവില്ലെന്ന്​ സി.ബി.എഫ്​.സി ചെയൻമാൻ പ്രസൂൺ ജോഷി പറഞ്ഞു. സിനിമ​െക്കതിരായ നീക്കത്തിൽ പ്രതിഷേധവും സങ്കടവുമുണ്ടെന്ന്​ പത്മാവതിയിലെ നായിക ദീപിക പദുകോൺ വ്യക്​തമാക്കി. പ്രദർശനം തടസ്സമുണ്ടാകാതെ നടക്കുമെന്നാണ്​​ പ്രതീക്ഷയെന്നും ജുഡീഷ്യറിയിൽ വിശ്വാസമുണ്ടെന്നും അവർ കൂട്ടിച്ചേർത്തു. 

14ാം നൂറ്റാണ്ടിലെ രജപുത്ര രാജ്​ഞി പത്മാവതിയുടെ കഥയാണ്​ സിനിമയുടെ ഇതിവൃത്തം. സിനിമ ചരിത്രത്തെ വളച്ചൊടിക്കുകയാണെന്ന്​ ആരോപിച്ച്​ രജ്​പുത്​ സംഘടനകളാണ്​ പ്രതിഷേധവുമായി രംഗത്തുവന്നത്​. റാണി പത്മിനിയെ മോശമായി ചിത്രീകരിക്കുന്നതാണ്​ സിനിമയിലെ രംഗങ്ങളെന്നും ഇവർ ആരോപിക്കുന്നു. ഡിസംബർ ഒന്നിനാണ്​ പത്മാവതിയുടെ റിലീസ്​. ​​സിനിമ ഇറങ്ങുകയാണെങ്കിൽ ഭാരത ബന്ദ്​ നടത്തുമെന്ന്​ കർണിസേന പ്രഖ്യാപിച്ചു.