ഷുഹൈബ്​ വധം: അക്രമിസംഘം ഉപയോഗിച്ച കാർ കസ്​റ്റഡിയിൽ 

കണ്ണൂർ: ഷുഹൈബ്​ വധവുമായി ബന്ധപ്പെട്ട്​ അക്രമിസംഘം ഉപയോഗിച്ച കാർ പൊലീസ്​ കസ്​റ്റഡിയിൽ. വളപട്ടണം​ പൊലീസ്​ സ്​റ്റേഷൻ പരിധിയിൽ അരോളിയിലെ വീട്ടിൽനിന്നാണ്​ വെള്ള വാഗൺ ആർ കാർ ശനിയാഴ്​ച രാവിലെ പൊലീസ്​ കണ്ടെത്തിയത്​. വാടകക്ക്​ നൽകുന്ന കാറാണിത്​.

ഷുഹൈബ്​ കൊല്ലപ്പെട്ട ദിവസങ്ങളിൽ ഇൗ കാർ മട്ടന്നൂർ ഭാഗത്തുള്ള ആൾക്ക്​ നൽകിയിരുന്നതായി പൊലീസിന്​ വിവരം ലഭിച്ചിരുന്നു. ഹർത്താൽ ദിനത്തിന്​ ശേഷമാണ്​ കാർ, ഉടമക്ക്​ തിരിച്ചുലഭിച്ചതെന്ന്​ കണ്ടെത്തിയിട്ടുണ്ട്​. ഷുഹൈബ്​ വധക്കേസിൽ അറസ്​റ്റിലായ ആകാശ്​ തില്ല​േങ്കരി തളിപ്പറമ്പിലെ ഒരു സുഹൃത്ത്​ വഴിയാണ്​ കാർ ഏർപ്പാടാക്കിയതെന്നാണ്​ പൊലീസ്​ അന്വേഷണത്തിൽ കണ്ടെത്തിയത്​.  

ഷുഹൈബ് വധം; മുഖ്യമന്ത്രിയുടെ ഓഫിസിലേക്ക് തള്ളിക്കയറാന്‍ ശ്രമം
തിരുവനന്തപുരം: ഷുഹൈബ് വധക്കേസില്‍ സി.ബി.ഐ അന്വേഷണം ആവശ്യപ്പെട്ട് സെക്ര​േട്ടറിയറ്റിലേക്ക് യൂത്ത് കോണ്‍ഗ്രസ് നടത്തിയ മാര്‍ച്ചിനിടെ മുഖ്യമന്ത്രിയുടെ ഓഫിസിലേക്ക് തള്ളിക്കയറാന്‍ ശ്രമിച്ച വനിത നേതാവ്​ ഉൾപ്പെടെ നാലുപ്രവർത്തകരെ പൊലീസ്​ അറസ്​റ്റു ചെയ്​തു. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി ജി. ലീന, പ്രവര്‍ത്തകരായ ആൻറണി, കുന്നുകുഴി ബിജു, അഴൂര്‍ സജിത്ത്  എന്നിവരാണ്​ അറസ്​റ്റിലായത്​. ഇവരെ ചീഫ് ജുഡീഷ്യല്‍ മജിസ്‌ട്രേറ്റ് കോടതിയിൽ ഹാജരാക്കി റിമാൻഡ്​​ ചെയ്തു. കൂടാതെ സമരത്തിന്​  പിന്തുണ അർപ്പിച്ച്​ യൂത്ത് കോണ്‍ഗ്രസ് നടത്തിയ സെക്ര​േട്ടറിയറ്റ്​ മാര്‍ച്ചിന് നേരെ പൊലീസ് ജലപീരങ്കി പ്രയോഗിച്ചു. 

സെക്ര​േട്ടറിയറ്റിലെ മുഖ്യമന്ത്രിയുടെ ഒാഫിസിലേക്ക്​ അതിക്രമിച്ചു കയറാൻ ശ്രമിച്ച യൂത്ത്​ കോൺഗ്രസ്​ പ്രവർത്തകരെ പൊലീസ്​ അറസ്​റ്റ്​ ചെയ്​ത്​ നീക്കുന്നു

 

നിരവധി പ്രവർത്തകർക്ക്​ നിസ്സാര പരിക്കേറ്റു. ശനിയാഴ്ച ഉച്ചക്ക്​ ഒന്നരയോടെയാണ് സംഭവം. എം. വിന്‍സ​െൻറ്​ എം.എൽ.എയുടെ കാറിലാണ് നാലുപേരും സെക്ര​േട്ടറിയറ്റിനുള്ളില്‍ കടന്നതെന്ന്​ സി.സി.ടി.വി ദൃശ്യങ്ങളിൽ വ്യക്​തമാണെന്ന്​ പൊലീസ്​  അറിയിച്ചു. എന്നാൽ, കാറില്‍ എം.എല്‍.എ ഉണ്ടായിരുന്നില്ല. തുടര്‍ന്ന് നാലുപേരും മുഖ്യമന്ത്രിയുടെ ഓഫിസ് കെട്ടിടത്തിലേക്ക് പ്രവേശിക്കാന്‍ ശ്രമിച്ചു. ഇവരെ സുരക്ഷാ ചുമതലയുള്ള പൊലീസുകാര്‍ തടഞ്ഞു. ഇതോടെ യൂത്ത് കോണ്‍ഗ്രസ് പ്രവര്‍ത്തകര്‍ മുദ്രാവാക്യം വിളിച്ച് പതാകയുമായി ഓഫിസിനുള്ളിലേക്ക് തള്ളിക്കയറാന്‍  ശ്രമിച്ചു. കൂടുതല്‍ പൊലീസ് സ്ഥലത്തെത്തി നാലുപേരെയും കസ്​റ്റഡിയിലെടുത്ത് നന്ദാവനം പൊലീസ് ക്യാമ്പിലേക്ക് മാറ്റി. വിവരമറിഞ്ഞ് കെ.പി.സി.സി അധ്യക്ഷന്‍ എം.എം. ഹസന്‍, എം.എൽ.എമാരായ  വി.എസ്. ശിവകുമാര്‍, എം. വിന്‍സ​െൻറ്​, ഡി.സി.സി പ്രസിഡൻറ്​  നെയ്യാറ്റിന്‍കര സനല്‍ എന്നിവര്‍ പൊലീസ് ക്യാമ്പിലെത്തി. 

അറസ്​റ്റുചെയ്​തവരെ ജാമ്യത്തില്‍ വിടണമെന്ന് ആവശ്യപ്പെട്ട് പ്രവര്‍ത്തകര്‍ ബഹളം ​െവച്ചത് സംഘര്‍ഷാന്തരീക്ഷം സൃഷ്​ടിച്ചു. ലീനയെ വൈകീ​േട്ടാടെ വനിത ജയിലിലേക്ക്​ മാറ്റി. അതേസമയം, ഷുഹൈബ്​ വധക്കേസിൽ​ സി.ബി.​െഎ അന്വേഷണം ആവശ്യപ്പെട്ട്​ യൂത്ത്​ കോൺഗ്രസ്​ സംസ്​ഥാന  പ്രസിഡൻറ്​ ഡീൻ കുര്യാക്കോസ്​, വൈസ്​ പ്രസിഡൻറ്​ സി.ആർ. മഹേഷ്​ എന്നിവരുടെ നേതൃത്വത്തിൽ സെക്ര​േട്ടറിയറ്റിന്​ മുന്നിൽ നടത്തുന്ന നിരാഹാരസമരം ആറാം ദിവസം പിന്നിട്ടു.