ശബരിമല സ്​ത്രീപ്രവേശം: നിയമം തൃപ്​തി ദേശായിക്കും ബാധകമെന്ന്​ കടകംപള്ളി

പത്തനംതിട്ട: ശബരിമലയിലെ സ്​ത്രീപ്രവേശം സുപ്രീംകോടതി വിധിക്ക്​ ശേഷമെന്ന്​ ദേവസ്വം മന്ത്രി കടകംപള്ളി സുരേന്ദ്രൻ. നിലവിൽ ശബരിമലയിൽ തുടരുന്നത്​ ദേവസ്വം ബോർഡി​​െൻറ ആചാരങ്ങളും നിയമങ്ങളുമാണ്​. സ്​ത്രീപ്രവേശവുമായി ബന്ധപ്പെട്ട ദേവസ്വം ബോർഡി​​െൻറ നിയമങ്ങൾ സാമൂഹിക പ്രവർത്തക തൃപ്​തി ദേശായിക്കും ബാധകമാണെന്നും മന്ത്രി വ്യക്തമാക്കി. ജനുവരിയില്‍ ശബരിമലയില്‍ എത്തുമെന്ന  തൃപ്തി ദേശായിയുടെ പ്രസ്​താവന സംബന്ധിച്ച മാധ്യമപ്രവർത്തകരുടെ ചോദ്യത്തിന്​ മറുപടി പറയുകയായിരുന്നു അദ്ദേഹം.   

പയ്യന്നൂരില്‍ ‘സ്വതന്ത്രലോകം 2016’ സെമിനാര്‍ ഉദ്ഘാടനം ചെയ്യാനെത്തിയപ്പോഴാണ്​ ജനുവരിയിൽ ശബരിമലയിൽ പ്രവേശിക്കുമെന്ന്​ തൃപ്​തി ദേശായ്​ വ്യക്തമാക്കിയത്​. മറ്റ് അയ്യപ്പക്ഷേത്രങ്ങളില്‍ സ്ത്രീപ്രവേശനത്തിന് വിലക്കില്ലാതിരുന്നിട്ടും ശബരിമലയിൽ എന്തുകൊണ്ട്​ പ്രവേശം അനുവദിക്കുന്നില്ലെന്നും വിശ്വാസത്തെയല്ല, വിശ്വാസക്കച്ചവടത്തെയാണ് താൻ ചോദ്യംചെയ്യുന്നതെന്നുമാണ്​ തൃപ്​തി ദേശായ്​ പറഞ്ഞത്​.  സ്ത്രീകളുടെ അവകാശത്തിനു വേണ്ടിയാണ്​ ക്ഷേത്രങ്ങളിലെ ലിംഗവിവേചനം ചോദ്യം ചെയ്​തത്​. കേരളത്തിലെ മതേതരസര്‍ക്കാറില്‍ പ്രതീക്ഷയുണ്ടെന്നും അവർ വ്യക്തമാക്കിയിരുന്നു.