പെരിങ്ങത്തൂരിലെ വീട്ടമ്മയുടെ മരണം കൊലപാതകം

പെരിങ്ങത്തൂർ: പെരിങ്ങത്തൂരിനടുത്ത മത്തിപ്പറമ്പിൽ ചാക്കേരി താഴെകുനിയില്‍ ഗോപിയുടെ ഭാര്യ റീജയുടെ (36) മരണം കൊലപാതകമാണെന്ന് സ്ഥിരീകരിച്ചു. റീജ മരിച്ചത് ക്രൂരമായ ബലാത്സംഗശ്രമത്തിന് ഇരയായശേഷമാണെന്ന്​ പൊലീസ്​ പറഞ്ഞു. സംഭവത്തിൽ അയല്‍വാസിയായ യുവാവിനെ ചൊക്ലി പൊലീസ്​ അറസ്​റ്റ്​ ചെയ്​തു. മേക്കുന്ന് മത്തിപ്പറമ്പിലെ വലിയ കാട്ടിൽ ഹൗസിൽ അൻസാറാണ്​ (24) പിടിയിലായത്​. കുറ്റം സമ്മതിച്ച പ്രതിക്കെതിരെ കൊലക്കുറ്റത്തിന് കേസെടുത്തു. 

നാങ്ങണ്ടി പള്ളിപ്പരിസരത്തെ വയലിലെ ഇടവഴിയിൽവെച്ചാണ്​ പ്രതി റീജയെ ആക്രമിച്ചത്​. മാനഭംഗപ്പെടുത്തുന്നത് തടയാൻ ശ്രമിച്ച റീജയുടെ വായും മൂക്കും പ്രതി അമർത്തിപ്പിടിച്ചതിനെ തുടർന്ന്​ ശ്വാസം മുട്ടിയാണ്​ മരണം സംഭവിച്ചത്​. റീജ മരിച്ചുവെന്ന്​ തിരിച്ചറിഞ്ഞ പ്രതി സ്വർണാഭരണങ്ങൾ ഉൗരിമാറ്റി. 

സംഭവത്തിന് പിന്നിൽ ഇതരസംസ്ഥാന തൊഴിലാളികളാണെന്ന് തെറ്റിദ്ധരിപ്പിക്കാനാണ് ഇങ്ങനെ ചെയ്തതെന്നാണ്​ സംശയിക്കുന്നതെന്ന് ​െപാലീസ് പറഞ്ഞു. അൻസാർ  കൈക്കലാക്കിയ റീജയുടെ താലിമാലയുടെ ഒരുഭാഗവും മോതിരമടക്കമുള്ള സ്വര്‍ണാഭരണങ്ങളും പൊലീസ് കണ്ടെത്തി.തിങ്കളാഴ്ച വൈകീട്ടാണ്​ തോട്ടില്‍ റീജയുടെ മൃതദേഹം കണ്ടെത്തിയത്​. പരിയാരം മെഡിക്കല്‍ കോളജിൽ പോസ്​റ്റ്​മോര്‍ട്ടം നടത്തിയപ്പോഴാണ്​ ക്രൂരമായ കൊലപാതകത്തിലേക്കുള്ള സൂചന ലഭിച്ചത്​. തുടർന്ന്​ പൊലീസ്​ നടത്തിയ പഴുതടച്ചുള്ള അന്വേഷണത്തിൽ​ മണിക്കൂറുകള്‍ക്കകം പ്രതി വലയിലായി. റീജയുടെ മരണത്തിൽ ബന്ധുക്കളും നാട്ടുകാരും സംശയംപ്രകടിപ്പിച്ചിരുന്നു. 

അനിഷ്​ട സംഭവങ്ങളുണ്ടാവാതിരിക്കാൻ മത്തിപ്പറമ്പിലെ പ്രതിയുടെ വീടിന് ​െപാലീസ് കാവൽ ഏർപ്പെടുത്തി. പാനൂർ സി.ഐ സജീവ് ആണ് കേസ് അന്വേഷിക്കുന്നത്. പ്രതിയെ സംഭവസ്ഥലത്തെത്തിച്ച്​ തെളിവെടുത്തു.