ഉഴവൂർ എന്ന രാഷ്​ട്രീയ ഹാസ്യസാമ്രാട്ട്​

കോട്ടയം: നർമ സംഭാഷണങ്ങളിലൂടെ ജനഹൃദയത്തിൽ സ്​ഥാനം നേടിയ നേതാവായിരുന്നു എൻ.സി.പി സംസ്​ഥാന അധ്യക്ഷൻ ഉഴവൂർ വിജയൻ. ഹാസ്യത്തിലൂടെയുളള രാഷ്​ട്രീയ പരിഹാസം എതിർചേരിയിൽ ഉള്ളവർ പോലും കൈനീട്ടി സ്വീകരിച്ചതാണ്​.  ഇത്തരം സംഭാഷണ രീതി നന്നല്ലെന്ന്​ പറയുന്നവരോട്​ താൻ രഷ്​ട്രപതിയാകുന്നില്ലെന്ന മറുപടിയാണ്​ ഉഴവൂർ നൽകിയിരുന്നത്​. 

തെരഞ്ഞെടുപ്പിൽ മത്​സരിക്കാറില്ലെങ്കിലും​ പ്രചാരണങ്ങളിലെ മിന്നും താരമായിരുന്നു വിജയൻ. 2001ൽ  കെ.എം. മാണിക്കെതി​രെ പാലായിൽ മത്​സരിച്ച്​ തോറ്റശേഷം പിന്നീട്​ തെരഞ്ഞെടുപ്പ്​ ഗോദയിൽ​ വന്നിട്ടില്ല. സംഘടനാ രാഷ്ട്രീയത്തില്‍ ശ്രദ്ധ ചെലുത്തിയിരുന്ന ഉഴവൂര്‍ എന്നും സാധാരണക്കാരായ ജനങ്ങള്‍ക്കൊപ്പമായിരുന്നു.

കെ.എസ്​.യുവിലൂടെ പൊതുരംഗത്തെത്തി കോണ്‍ഗ്രസിലൂടെ രാഷ്ട്രീയവളർച്ച നേടി. കോണ്‍ഗ്രസ് പിളര്‍ന്നപ്പോള്‍ കോണ്‍ഗ്രസ് എസിനൊപ്പം. പിന്നീട്​ എൻ.സി.പിയിൽ കോൺഗ്രസ്​ എസ്​ ലയിക്കുകയും എൽ.ഡി.എഫിനൊപ്പം ഉറച്ചു നിൽക്കുകയും ചെയ്​തു. 

രണ്ട് തവണ കോട്ടയം ജില്ല കൗണ്‍സിലിലേക്ക് തെരഞ്ഞെടുക്കപ്പെട്ടു. വികലാംഗക്ഷേമ പെന്‍ഷന്‍ ബോര്‍ഡ് ചെയര്‍മാന്‍, മലിനീകരണ നിയ​ന്ത്രണ ബോര്‍ഡ് അംഗം, എഫ്​.സി.​​െഎ ഉപദേശക സമിതി അംഗം എന്നീ നിലകളില്‍ പ്രവര്‍ത്തിച്ചിട്ടുണ്ട്. 2015ലാണ് എൻ.സി.പി സംസ്ഥാന അധ്യക്ഷനായി തെരഞ്ഞെടുക്കുന്നത്. നേതൃത്വത്തില്‍ സജീവമായി തുടരുന്നതിനിടെയാണ് ഉദര സംബന്ധമായ രോഗങ്ങളെ തുടര്‍ന്ന് ഉഴവൂരിനെ ആശുപത്രിയില്‍ പ്രവേശിപ്പിച്ചത്.