പള്ളിപ്രം ബാലൻ അന്തരിച്ചു

കണ്ണൂർ:  മുതിർന്ന സി.പി.ഐ നേതാവും മുൻ എം.എൽ.എയുമായ പള്ളിപ്രം ബാലൻ (78) അന്തരിച്ചു. ബാലസംഘം യൂനിറ്റ്​ സെക്രട്ടറിയായാണ്​ രാഷ്​ട്രീയപ്രവർത്തനം ആരംഭിച്ചത്​. എ.ഐ.വൈ.എഫ് താലൂക്ക് സെക്രട്ടറിയുമായിരുന്നു. ദീർഘകാലം സി.പി.ഐ സംസ്​ഥാന എക്സിക്യൂട്ടിവ് അംഗമായി പ്രവർത്തിച്ചു.

വലിയന്നൂർ ബ്രാഞ്ച് സെക്രട്ടറി, കണ്ണൂർ, തളിപ്പറമ്പ് താലൂക്ക് സെക്രട്ടറി, കണ്ണൂർ ജില്ല സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്. കണ്ണൂർ ജില്ല പഞ്ചായത്ത് അംഗം, സംസ്​ഥാന പട്ടികജാതി-പട്ടികവർഗ വികസന കോർപറേഷൻ ചെയർമാൻ എന്നീ നിലകളിലും പ്രവർത്തിച്ചു. ബി.കെ.എം.യു സംസ്​ഥാന പ്രസിഡൻറ്, ട്രഷറർ, ഐപ്സോ, കേരള ആദിവാസി യൂനിയൻ സംസ്​ഥാന സെക്രട്ടറി എന്നീ നിലകളിലും പ്രവർത്തിച്ചിട്ടുണ്ട്.

1987ൽ ഹോസ്​ദുർഗിൽനിന്ന് മത്സരിച്ച് പരാജയപ്പെട്ടു. 2006ൽ അവിടെനിന്നുതന്നെ മത്സരിച്ച് നിയമസഭാംഗമായി. എ. പുഷ്പയാണ് ഭാര്യ. മക്കൾ: സുനിൽകുമാർ, ശെൽവൻ.

മൃതദേഹം കണ്ണൂർ എ.കെ.ജി ആശുപത്രിയിൽ. ഞായറാഴ്​ച രാവിലെ ഒമ്പതിന്​ വീട്ടിലെത്തിച്ചതിനുശേഷം ഉച്ചക്കു രണ്ടുമുതൽ സി.പി.​െഎ കണ്ണൂർ ജില്ല കൗൺസിൽ ഓഫിസിൽ പൊതുദർശനത്തിനുവെക്കും. സംസ്കാരം വൈകീട്ട്​ നാലിന്​ പയ്യാമ്പലത്ത്​.