ബി.ജെ.പി ഭരിക്കുന്ന സംസ്​ഥാനങ്ങളിൽ ശ്മശാനം പണിയണമെന്ന്​ മായാവതി

ലഖ്​നോ: ഉത്തർ പ്രദേശിനെ കുറിച്ച് ​സംസാരിക്കുന്നതിന്​ മുമ്പ് ​ബി.ജെ.പി ഭരിക്കുന്ന സംസ്​ഥാനങ്ങളിലെ എല്ലാ ഗ്രാമങ്ങളിലും ശ്മശാനം നിർമിക്കുന്ന കാര്യം പ്രധാനമന്ത്രി നരേന്ദ്രമോദി ഉറപ്പ്​ വരുത്തണമെന്ന്​ ബി.എസ്.​പി അധ്യക്ഷ മായാവതി. യു.പിയിൽ ഫത്തേപ്പൂരിയിലെ തെരഞ്ഞെടുപ്പ്​ റാലിയെ അഭിസംബോധന ചെയ്യവെയാണ്​ അവർ ഇക്കാര്യം പറഞ്ഞത്​.  യു.പിയിലെ ഭരണ കക്ഷിയായ സമാജ്​വാദി പാർട്ടി ഒരു പ്രത്യേക സമുദായത്തോട്​ നീതിയുക്​തമല്ലാത്ത സമീപനം സ്വീകരിക്കുകയാണെന്നും മായാവതി ആരോപിച്ചു.

ബി.എസ്​പി അധികാരത്തിലിരുന്നപ്പോൾ എല്ലാ മതങ്ങളെയും ബഹുമാനിച്ചിരുന്നു. ഉത്സവം നടക്കു​േമ്പാൾ വൈദ്യുതി നൽകുകയും ക്രമസമാധാനം ഉറപ്പ്​ വരുത്തുകയും ചെയ്​തിരുന്നു. തെരഞ്ഞെടുപ്പ് ​പ്രചാരണ റാലികളിലെല്ലാം മതവും ജാതിയുമായി ബന്ധപ്പെട്ട വിഷയങ്ങളാണ്​ മോദി ഉയർത്തുന്നത്​. യു.പിയിൽ ബി.ജെ.പിക്ക്​ സർക്കാർ രൂപീകരിക്കാൻ കഴിയില്ലെന്ന്​ അവർ തിരിച്ചറിയണമെന്നും മായാവതി പറഞ്ഞു.

യു.പിയിൽ ഏഴു ഘട്ടമായി നടക്കുന്ന തെരഞ്ഞെടുപ്പിൽ മാർച്ച്​ 11നാണ്​ ഫലം പ്രഖ്യാപിക്കുന്നത്​. നേരത്തെ ബി.എസ്.​പി ബഹുജൻ സമാജ്​ പാർട്ടിയിൽ നിന്നും​ ബഹൻജി സംബന്തി പാർട്ടിയായി മാറിയതായും റമദാന്​ വൈദ്യുതിയുണ്ടെങ്കിൽ ദീപാവലിക്കും അത്​ ഉറപ്പു വരുത്താൻ സമാജ്​വാദി പാർട്ടി തയ്യാറാകണമെന്നും തെരഞ്ഞെടുപ്പ്​ റാലിയിൽ ​ മോദി പറഞ്ഞിരുന്നു. 

 ​