കൊടനാട്​ എസ്​റ്റേറ്റ്​ സംഭവം: ഒന്നാം പ്രതി വാഹനാപകടത്തിൽ മരിച്ചു; രണ്ടാം പ്രതിക്ക്​ ഗുരുതര പരിക്ക്​

കോയമ്പത്തൂർ/കുഴൽമന്ദം: മുൻ തമിഴ്​നാട്​ മുഖ്യമന്ത്രി ജയലളിതയുടെ വേനൽക്കാല വസതിയായിരുന്ന കോടനാട്​ എസ്​റ്റേറ്റിലെ കാവൽക്കാരനെ കൊലപ്പെടുത്തി കവർച്ചക്ക്​ ശ്രമിച്ച കേസിലെ പ്രതികൾ വ്യത്യസ്​തയിടങ്ങളിൽ വാഹനാപകടങ്ങളിൽപ്പെട്ടു. ഒന്നാംപ്രതി എടപ്പാടി ചിന്നസമുദ്രം ചിത്തിരപാളയത്തെ കനകരാജ്​ സേലത്തും രണ്ടാംപ്രതി കോയമ്പത്തൂർ കെ.സി.സി ടവറിൽ വി.സി.പി ലേ ഔട്ടിൽ കെ.വി. സയൻ പാലക്കാട്ടുമാണ്​ അപകടത്തിൽപ്പെട്ടത്​. കനകരാജ്​ സംഭവസ്​ഥലത്ത്​ തന്നെ മരിച്ചു. സയനെ അതിഗുരുതര നിലയിൽ കോയമ്പത്തൂർ കുപ്പുസ്വാമി നായിഡു മെമോറിയൽ ആശുപത്രിയിൽ പ്രവേശിപ്പിച്ചു. ഇയാളുടെ ഭാര്യ വിനുപ്രിയ (30), മകൾ നീതു (ആറ്​​) എന്നിവർ മരിച്ചു. പൊലീസ്​ തേടുന്ന ഒന്നും രണ്ടും പ്രതികൾ 24 മണിക്കൂറിനകം വ്യത്യസ്​ത അപകടങ്ങളിൽ കൊല്ലപ്പെട്ടതിൽ ദുരൂഹതയുയർന്നിട്ടുണ്ട്​​. സംഭവം രാഷ്​​ട്രീയ കേന്ദ്രങ്ങളിലും പൊലീസിലും ഞെട്ടലുളവാക്കി. കനകരാജിനെ വാഹനമിടിപ്പിച്ച്​​ കൊലപ്പെടുത്തുകയായിരുന്നെന്നും സയൻ ആത്​മഹത്യക്ക്​ ശ്രമിക്കുകയായിരുന്നെന്നുമാണ്​ പറയപ്പെടുന്നത്​.

വെള്ളിയാഴ്​ച രാത്രി സേലം ആത്തൂരിന്​ സമീപമുണ്ടായ അപകടത്തിലാണ്​ കനകരാജ്​ മരിച്ചത്​. രണ്ടുദിവസം മുമ്പാണ്​ ഇയാൾ എടപ്പാടിയിലെത്തിയത്​. സുഹൃത്തി​​െൻറ​ ബൈക്കിൽ ആത്തൂർ ശക്തിനഗറിലെ ബന്ധുവീട്ടിലെത്തി മടങ്ങവെ ചെന്നൈ -സേലം ബൈപാസ്​ റോഡിലെ തെന്നങ്കുടിപാളയം ചന്ദനഗിരി പിരിവിലാണ്​ ബംഗളൂരുവിൽനിന്ന്​ പെരമ്പലൂരിലേക്ക്​ വരികയായിരുന്ന കർണാടക രജിസ്​ട്രേഷൻ ഫോർഡ്​ കാർ ഇടിച്ചത്​. ആത്തൂർ ഗവ. ആശുപത്രിയിലെത്തിച്ചെങ്കിലും മരിച്ചു. കനകരാജി​​െൻറ ജ്യേഷ്​ഠനും അണ്ണാ ഡി.എം.കെ പ്രാദേശിക നേതാവുമായ ധനപാൽ നൽകിയ പരാതിയുടെ അടിസ്​ഥാനത്തിൽ കാർ ഡ്രൈവർ തമ്മംപട്ടി സ്വദേശി റഫീഖിനെ പൊലീസ്​ കസ്​റ്റഡിയിലെടുത്തു​. കവർച്ചാശ്രമക്കേസിൽ കനകരാജിനെ തേടി പൊലീസ്​ ചെന്നൈയിലേക്ക്​ പോയിരുന്നു. പിടിയിലാവുമെന്നുറപ്പായതോടെ എടപ്പാടിയിലെത്തിയ ഇയാൾ ആത്തൂർ പൊലീസിൽ കീഴടങ്ങാനും പദ്ധതിയിട്ടിരുന്നു. അതിനിടെയാണ്​ ദുരൂഹസാഹചര്യത്തിൽ കൊല്ലപ്പെട്ടത്​.

2011^13 കാലത്ത്​ ജയലളിതയുടെ ഡ്രൈവറായിരുന്നു. ഡ്രൈവർ പദവി ദുരുപയോഗപ്പെടുത്തിയതോടെ പുറത്താക്കി. പിന്നീട്​ ചെന്നൈ വടപളനിയിൽ ടാക്​സി ഡ്രൈവറായിരുന്നു. കലൈവാണിയാണ്​ ഭാര്യ. ഒരു വയസ്സുള്ള പെൺകുഞ്ഞുണ്ട്​. കവർച്ച കേസന്വേഷിക്കുന്ന ഡി.എസ്​.പി ശക്തിവേൽ, ഇൻസ്​പെക്​ടർ ബാലമുരളി എന്നിവരുടെ നേതൃത്വത്തിൽ ആത്തൂരിൽ ക്യാമ്പ്​ ചെയ്യുന്നുണ്ട്​. മൃതദേഹം പോസ്​റ്റുമോർട്ടം ചെയ്​ത്​ ബന്ധുക്കൾക്ക്​ വിട്ടുകൊടുത്തു. അപകടസാധ്യത വളരെ കുറഞ്ഞ സ്​ഥലത്താണ്​ സംഭവ​െമന്നും ദുരൂഹതയുണ്ടെന്നും സഹോദരൻ ധനപാൽ പറഞ്ഞു.   

കേസിലെ രണ്ടാംപ്രതി സയൻ ഓടിച്ച കാർ പാലക്കാട് കണ്ണാടി കാഴ്ചപറമ്പിൽ നിർത്തിയിട്ട ലോറിയിലിടിച്ചാണ്​ ഭാര്യയും മകളും മരിച്ചത്​. ശനിയാഴ്ച രാവിലെ ആറരയോടെയായിരുന്നു അപകടം. കോയമ്പത്തൂരിൽനിന്ന് ഇരിങ്ങാലക്കുടയിലേക്ക് വരികയായിരുന്നു ഇവർ. സയനെ ആദ്യം പാലക്കാട്ടും പിന്നീട് കോയമ്പത്തൂരിലേക്കും മാറ്റി. ഇരിങ്ങാലക്കുട സ്വദേശികളായ ഇവർ വർഷങ്ങളായി കോയമ്പത്തൂരിലാണ് താമസം. വിശദമായ പോസ്​റ്റ്​മോർട്ടത്തിനായി മൃതദേഹം തൃശൂർ മെഡി. കോളജ്​ ആശുപത്രിയിലേക്ക് മാറ്റി.