ആയുധ വ്യാപാരി അഭിഷേക്​ വർമക്ക്​ തടവും പിഴയും

ന്യൂഡൽഹി: ചോദ്യംചെയ്യലിന്​ ഹാജരാകാനുള്ള എൻഫോഴ്​സ്​മ​െൻറ്​ ഡയറക്​ടറേറ്റി​​െൻറ ക്ഷണം പലതവണ നിരസിച്ച വിവാദ ആയുധവ്യാപാരി അഭിഷേക്​ വർമക്ക്​ ആറ്​ മാസം ജയിൽ ശിക്ഷ. 2000രൂപ പിഴയും ചുമത്തി. വിദേശവിനിമയനിയന്ത്രണചട്ട ലംഘനപ്രകാരം രജിസ്​റ്റർ ചെയ്​ത കേസിലാണ്​ അന്വേഷണവിഭാഗം 1999ൽ വർമയെ ചോദ്യംചെയ്യാൻ വിളിപ്പിച്ചത്​. ഏഴുതവണ വിളിച്ചെങ്കിലും എത്തിയില്ല. തുടർന്ന്​ 2005ൽ വർമക്കെതിരെ കേസ്​ രജിസ്​റ്റർ ചെയ്യുകയായിരുന്നു. 

അതേസമയം, ശിക്ഷിക്കപ്പെട്ട അത്രയും കാലയളവ്​ നേരത്തേ ജയിൽശിക്ഷ അനുഭവിച്ചിട്ടുള്ളതിനാൽ വർമ​ ഇനി തടവിൽ കഴിയേണ്ടതില്ലെന്ന്​ ഡൽഹി അഡീഷനൽ മെട്രോപൊളിറ്റൻ മജിസ്​ട്രേറ്റ്​ ജ്യോതി ക്​ലേർ പുറപ്പെടുവിച്ച ഉത്തരവിൽ പറയുന്നു. 

ചോദ്യംചെയ്യലിന്​ സഹകരിക്കാത്തതിനാൽ അന്വേഷണം വൈകിയെന്ന്​ അന്വേഷണ ഏജൻസിക്കുവേണ്ടി ഹാജരായ കോൺസൽ എൻ.കെ. മട്ട കോടതിയിൽ ബോധിപ്പിച്ചു. കള്ളപ്പണം വെളുപ്പിക്കൽ, വഞ്ചന, അഴിമതി തുടങ്ങി നിരവധി കേസുകളിൽ പ്രതിയാണ്​ വർമ.