12:30:26
26 Jul 2014
Saturday
Facebook
Google Plus
Twitter
Rssfeed

ബഹുരാഷ്ട്ര ഭീമന്‍ മുട്ടുമടക്കുന്നു

ബഹുരാഷ്ട്ര ഭീമന്‍  മുട്ടുമടക്കുന്നു

ഇന്ത്യന്‍ പേറ്റന്‍റ് നിയമത്തിലെ 3 (ഡി) വകുപ്പ് ചോദ്യംചെയ്ത് നൊവാര്‍ട്ടിസ് എന്ന സ്വിസ് ബഹുരാഷ്ട്ര മരുന്നുകമ്പനി ഇന്ത്യന്‍ സുപ്രീംകോടതിയില്‍ ഫയല്‍ ചെയ്ത കേസില്‍ കമ്പനിക്കെതിരെ വിധി വന്നത് ലോകമെമ്പാടുമുള്ള ജനകീയാരോഗ്യ പ്രവര്‍ത്തകരെ ആവേശംകൊള്ളിച്ചിരിക്കയാണ്. അനാവശ്യ പേറ്റന്‍റുകള്‍ തടയുന്നതിനായി ഇന്ത്യന്‍ പേറ്റന്‍റ് നിയമത്തില്‍ ഉള്‍പ്പെടുത്തിയ 3 (ഡി) എന്ന വകുപ്പ് ട്രിപ്സ് നിയമങ്ങള്‍ക്കെതിരാണെന്ന് അവകാശപ്പെട്ട് നൊവാര്‍ട്ടിസ് ഇന്ത്യന്‍ കോടതികളില്‍ ഫയല്‍ചെയ്ത കേസ് സാര്‍വദേശീയ ശ്രദ്ധ ആകര്‍ഷിച്ചിരുന്നു. കേസില്‍ നൊവാര്‍ട്ടിസിന് അനുകൂലമായ വിധിയുണ്ടായിരുന്നെങ്കില്‍ 3 (ഡി) വകുപ്പ് റദ്ദുചെയ്യപ്പെടുകയും അനാവശ്യ പേറ്റന്‍റുകളുടെ വലിയൊരു പ്രളയംതന്നെയുണ്ടാവുകയും ചെയ്യുമായിരുന്നു.

നൊവാര്‍ട്ടിസിന്‍െറ അത്യാര്‍ത്തി
ക്രോണിക് മയലോയ്ഡ് ലുക്കീമിയ എന്ന രക്താര്‍ബുദത്തിന്‍െറ ചികിത്സക്കായി ഇമാറ്റിനിബ് മെസിലേറ്റ് (Imatinib Mesylate) എന്ന അടിസ്ഥാന രാസവസ്തു ഉപയോഗിച്ച് നൊവാര്‍ട്ടിസ് മാര്‍ക്കറ്റ് നിര്‍മിക്കുന്ന മരുന്നാണ് ഗ്ളീവക് (Gleevec). നൊവാര്‍ട്ടിസിനു പുറമേ ഇന്ത്യന്‍ കമ്പനികളായ നാറ്റ്കോ, സിപ്ളാ, ഹെട്ടറോ എന്നീ കമ്പനികളും ഇമാറ്റിനിബ് മെസിലേറ്റ് വിലകുറഞ്ഞ ജനറിക് ഔധമായി വിറ്റുവരുന്നുണ്ട്. ഇന്ത്യന്‍ കമ്പനിയുടെ മരുന്നിന്‍െറ പത്തിരട്ടി വിലക്കാണ് നൊവാര്‍ട്ടിസ് തങ്ങളുടെ ബ്രാന്‍ഡ് മരുന്ന് വില്‍ക്കുന്നത്. ഒരു മാസത്തെ ചികിത്സക്ക് ഇന്ത്യന്‍ കമ്പനികളുടെ മരുന്ന് വാങ്ങാന്‍ 10,000 രൂപ വേണ്ടിവരും. അതേസമയം, നൊവാര്‍ട്ടിസിന്‍െറ ഗ്ളീവക് ഉപയോഗിച്ചാല്‍ 1,20,000 രൂപ ചെലവിടേണ്ടിവരും. നൊവാര്‍ട്ടിസിന്‍െറ അത്യാര്‍ത്തി മാത്രമാണ് പാവപ്പെട്ട കാന്‍സര്‍ രോഗികള്‍ക്ക് ഫലത്തില്‍ ചികിത്സ കിട്ടാതാക്കുന്ന അവരുടെ നീക്കങ്ങള്‍ക്കു പിന്നിലെന്ന് കാണാന്‍ കഴിയും. ഗ്ളീവക്കിന്‍െറ വില്‍പനയിലൂടെ ഇതിനകം നൊവാര്‍ട്ടിസ് 290 കോടി ഡോളര്‍ (15,000 കോടി രൂപ) സമ്പാദിച്ചുകഴിഞ്ഞിട്ടുണ്ട്. എന്നിട്ടും ദുരതീരാത്ത ഈ ബഹുരാഷ്ട്ര ഭീമന്‍ ഇന്ത്യന്‍ പാര്‍ലമെന്‍റ് അംഗീകരിച്ച നിയമത്തെ ഇന്ത്യന്‍ കോടതികളില്‍ ചോദ്യംചെയ്യാന്‍ മടിച്ചില്ല.

കുത്തക വിപണനാധികാരം
ട്രിപ്സ് ഭേദഗതി 1995ലായിരുന്നു നടപ്പാക്കേണ്ടിയിരുന്നത്. അതിനു കഴിയാതിരുന്നതുമൂലം 1999നുശേഷം പേറ്റന്‍റ ് ചെയ്യപ്പെട്ട മരുന്നുകള്‍ മാര്‍ക്കറ്റ് ചെയ്യാന്‍ പേറ്റന്‍െറടുത്ത കമ്പനികള്‍ക്കു മാത്രമായി കുത്തകവിപണനാധികാരം (Exclusive Marketing Rights) നല്‍കിക്കൊണ്ടുള്ള വ്യവസ്ഥ, പേറ്റന്‍റ് നിയമത്തില്‍ 1999ല്‍ വരുത്തിയ ഒന്നാം ഭേദഗതിയില്‍ ഉള്‍പ്പെടുത്തിയിരുന്നു. ഇമാറ്റിനിബ് മെസിലേറ്റ് തങ്ങള്‍ 1995നുശേഷം പേറ്റന്‍റ് ചെയ്ത് ഗ്ളീവക് എന്ന ബ്രാന്‍ഡ് നാമത്തില്‍ വില്‍ക്കുകയാണെന്നും ഈ വ്യവസ്ഥപ്രകാരം മറ്റ് കമ്പനികള്‍ ഈ മരുന്ന് വില്‍ക്കുന്നത് തടയണമെന്നും ആവശ്യപ്പെട്ട് നൊവാര്‍ട്ടിസ് ചെന്നൈ ഹൈകോടതിയെ സമീപിച്ചു. നൊവാര്‍ട്ടിസിന്‍െറ ഈ വാദം അംഗീകരിച്ച് ഇന്ത്യന്‍ കമ്പനികള്‍ ഇമാറ്റിനിബ് മെസിലേറ്റ് വില്‍ക്കുന്നത് തടഞ്ഞ് കോടതി ഉത്തരവിട്ടു. ഇതിനെതിരെ കേസില്‍ കക്ഷിചേര്‍ന്ന് കാന്‍സര്‍ രോഗികളുടെ സംഘടന ഗ്ളീവക്കിന് പേറ്റന്‍റ് ലഭിച്ചത് 1995നുമുമ്പാണെന്ന് സുപ്രീംകോടതിയില്‍ തെളിയിച്ചതോടെ നൊവാര്‍ട്ടിസിന്‍െറ നീക്കം പരാജയപ്പെട്ടു.

പുതിയ തന്ത്രവുമായി നൊവാര്‍ട്ടിസ്
തങ്ങള്‍ ഉല്‍പാദിപ്പിക്കുന്ന ഗ്ളീവക് ഇന്ത്യന്‍ കമ്പനികളുടെ മരുന്നുകളില്‍നിന്ന് വ്യത്യസ്തമായ പുതിയ മരുന്നാണെന്ന് അവകാശപ്പെട്ട് പേറ്റന്‍റിനായി നൊവാര്‍ട്ടിസ് ചെന്നൈയിലെ പേറ്റന്‍റ് ഓഫിസില്‍ അപേക്ഷ നല്‍കി. ഗ്ളീവക് കൂടുതല്‍ ചികിത്സാക്ഷമതയുള്ള ഇമാറ്റിനിബ് മെസിലേറ്റിന്‍െറ ബീറ്റാ ക്രിസ്റ്റല്‍ ഫോമിലുള്ളതാണെന്നും ഇന്ത്യന്‍ കമ്പനികളുടേത് ചികിത്സാക്ഷമത കുറഞ്ഞ ഫ്രീ ബേസ് ഫോമിലുള്ളതാണെന്നും പേറ്റന്‍റ് അപേക്ഷയില്‍ നൊവാര്‍ട്ടിസ് അവകാശപ്പെട്ടു. ജൈവലഭ്യത (Bioavailability) മൂലം തങ്ങളുടെ മരുന്നിന്‍െറ ഫലസിദ്ധി മറ്റ് ഔധങ്ങളേക്കാള്‍ 30 ശതമാനം കൂടുതലാണെന്നും നൊവാര്‍ട്ടിസ് വാദിച്ചു. പേറ്റന്‍റ് അനുവദിക്കുന്നതിനു മുമ്പുള്ള എതിര്‍പ്പവകാശം ( Pre Grant Opposition) പ്രയോജനപ്പെടുത്തി ഇമാറ്റിനിബ് മെസിലേറ്റിന്‍െറ ജനറിക് ഉല്‍പാദകരിലൊന്നായ ഹൈദരാബാദിലെ നാറ്റ്കോ കമ്പനി നൊവാര്‍ട്ടിസിന്‍െറ അവകാശവാദം ശാസ്ത്രീയമായി നിലനില്‍ക്കുന്നതല്ലെന്ന് പേറ്റന്‍റ് കണ്‍ട്രോളറെ ബോധ്യപ്പെടുത്തി. തുടര്‍ന്ന് നൊവാര്‍ട്ടിസിന്‍െറ അപേക്ഷ പേറ്റന്‍റ് നിയമത്തിലെ 3 (ഡി) വകുപ്പ് പ്രയോഗിച്ച് പേറ്റന്‍റ് കണ്‍ട്രോളര്‍ തള്ളി.
തുടര്‍ന്ന്, ഇന്ത്യന്‍ ഭരണഘടനക്കും ട്രിപ്സ് നിബന്ധനകള്‍ക്കും എതിരായതുകൊണ്ട് 3 (ഡി) വകുപ്പ് റദ്ദാക്കണമെന്ന പുതിയൊരു വാദവുമായി നൊവാര്‍ട്ടിസ് ചെന്നൈ ഹൈകോടതിയില്‍ കേസ് ഫയല്‍ ചെയ്തു. ചെന്നൈ കോടതി നൊവാര്‍ട്ടിസിന്‍െറ വാദം അംഗീകരിക്കാത്തതിനെ തുടര്‍ന്ന് അവര്‍ സുപ്രീംകോടതിയില്‍ അപ്പീല്‍ കൊടുക്കുകയാണുണ്ടായത്. ജനങ്ങളുടെ ആരോഗ്യം സംരക്ഷിക്കുന്നതിനായി നിയമനിര്‍മാണം നടത്തുന്നതിനുള്ള രാജ്യത്തിന്‍െറ പരമാധികാരത്തെയാണ് നൊവാര്‍ട്ടിസ് യഥാര്‍ഥത്തില്‍ ചോദ്യംചെയ്തത്.

ജനകീയ പ്രതിരോധം
കോടതിയുദ്ധം തുടരുന്നതിനിടെ ഇന്ത്യയിലെ കാന്‍സര്‍ രോഗികളുടെ സംഘടനയായ കാന്‍സര്‍ പേഷ്യന്‍റ്സ് എയ്ഡ് അസോസിയേഷന്‍, ജനകീയാരോഗ്യ പ്രസ്ഥാനമായ ജനസ്വസ്ഥ്യ അഭിയാന്‍ തുടങ്ങിയ സംഘടനകള്‍ നൊവാര്‍ട്ടിസിന്‍െറ ജനവിരുദ്ധ തന്ത്രങ്ങളുടെ പ്രത്യാഘാതങ്ങള്‍ ജനങ്ങളെ അറിയിക്കുന്നതിനുള്ള കാമ്പയിന്‍ സംഘടിപ്പിച്ചു. ലോകമെമ്പാടുമുള്ള ജനകീയാരോഗ്യ പ്രവര്‍ത്തകരും സംഘടനകളും നൊവാര്‍ട്ടിസിനോട് കേസ് പിന്‍വലിക്കാന്‍ ആവശ്യപ്പെട്ട് ഒപ്പുശേഖരണം നടത്തി. ഇതിനകം നൂറ്റമ്പതോളം രാജ്യങ്ങളില്‍നിന്നായി അഞ്ചു ലക്ഷത്തോളം പേര്‍ നൊവാര്‍ട്ടിസിനെതിരെയുള്ള പ്രസ്താവനയില്‍ ഒപ്പുവെച്ചിട്ടുണ്ട്. 2012 ജൂലൈയില്‍ ദക്ഷിണാഫ്രിക്കയിലെ കേപ് ടൗണില്‍ നടന്ന ജനകീയാരോഗ്യ അസംബ്ളി നൊവാര്‍ട്ടിസിനോട് കേസില്‍നിന്ന് പിന്മാറാന്‍ ആവശ്യപ്പെട്ട് പ്രമേയം പാസാക്കി. നിരവധി രാജ്യങ്ങളില്‍നിന്നുള്ള പ്രതിനിധികള്‍ വികസ്വര രാജ്യങ്ങളുടെ ഫാര്‍മസിയായ ഇന്ത്യന്‍ ഔധവ്യവസായത്തെ നശിപ്പിക്കാനുള്ള നൊവാര്‍ട്ടിസിന്‍െറ കുത്സിത നീക്കങ്ങളോട് രോഷം പ്രകടിപ്പിച്ചുള്ള ബാനറുകളുമായാണ് ജനകീയാരോഗ്യ അസംബ്ളിയുടെ സമാപന ദിവസം സംഘടിപ്പിച്ച പ്രകടനത്തിനെത്തിയത്.

കേസിന്‍െറ പ്രസക്തി
നൊവാര്‍ട്ടിസ് സുപ്രീംകോടതിയിലെ കേസില്‍ വിജയിച്ച് 3 (ഡി) വകുപ്പ് റദ്ദായിരുന്നെങ്കില്‍ ഇന്ത്യയില്‍ മാത്രമല്ല, മറ്റ് നിരവധി രാജ്യങ്ങളിലും ഔധമേഖല പ്രതിസന്ധിയിലാകുമായിരുന്നു. 3 (ഡി) വകുപ്പിന്‍െറ ബലത്തില്‍ നിരവധി പേറ്റന്‍റ് അപേക്ഷകള്‍ ഇന്ത്യന്‍ പേറ്റന്‍റ് ഓഫിസ് നിരസിച്ചിട്ടുണ്ട്. നൊവാര്‍ട്ടിസ് കേസില്‍ വിജയിച്ചിരുന്നെങ്കില്‍ പൊതുജനാരോഗ്യ മേഖലയില്‍ സാര്‍വദേശീയമായി വലിയ പ്രത്യാഘാതം ഉണ്ടാകാന്‍ സാധ്യതയുണ്ടായിരുന്നു. നിരസിക്കപ്പെട്ട നിരവധി പേറ്റന്‍റുകള്‍ പല രാജ്യങ്ങള്‍ക്കും വീണ്ടും അനുവദിക്കേണ്ടിവരും. 3 (ഡി) വകുപ്പുമൂലം പേറ്റന്‍റ് അപേക്ഷ നല്‍കാന്‍ മടിച്ചുനില്‍ക്കുന്ന പല വന്‍ മരുന്നുകമ്പനികളും തങ്ങളുടെ നിലവിലുള്ള മരുന്നുകളില്‍നിന്ന് ഒരു മികവുമില്ലാത്ത മരുന്നുകള്‍ക്ക് പേറ്റന്‍റ് സമ്പാദിച്ച് ഭീമമായ വിലയിട്ട് മാര്‍ക്കറ്റ് ചെയ്യും. ഔധവില ഇനിയും കുതിച്ചുയരും.
നൊവാര്‍ട്ടിസ് കേസിലെ വിധി സ്വാഗതാര്‍ഹമാണെങ്കിലും അതുകൊണ്ടുമാത്രം ഇന്ത്യന്‍ ഔധമേഖല നേരിടുന്ന പ്രതിസന്ധികള്‍ പരിഹരിച്ച് അവശ്യമരുന്നുകള്‍ കുറഞ്ഞ വിലക്ക് ജനങ്ങള്‍ക്ക് ലഭ്യമാക്കാനാവില്ല. നേരത്തേ, മലയാളികൂടിയായ പി.എച്ച്. കുര്യന്‍ പേറ്റന്‍റ് കണ്‍ട്രോളറായിരുന്ന അവസരത്തില്‍ ജര്‍മന്‍ കമ്പനിയായ ബേയറുടെ വിലകൂടിയ മരുന്നിന് പകരമായി കുറഞ്ഞ വിലക്ക് മരുന്നുല്‍പാദിപ്പിക്കാന്‍ ഇന്ത്യന്‍ കമ്പനിയായ നാറ്റ്കോക്ക് നിര്‍ബന്ധിത ലൈസന്‍സ് പ്രകാരം അനുവാദം നല്‍കിയിരുന്നു. എന്നാല്‍, പിന്നീട് ഈ വകുപ്പുപയോഗിച്ച് കൂടുതല്‍ മരുന്നുകള്‍ക്ക് നിര്‍ബന്ധിത ലൈസന്‍സ് നല്‍കാന്‍ സര്‍ക്കാര്‍ തയാറായില്ല. അതിനിടെ, മരുന്നു വില ഇനിയും കുത്തനെ ഉയര്‍ത്താന്‍ സാധ്യതയുള്ള കമ്പോളാധിഷ്ഠിത വിലനിശ്ചയിക്കല്‍ നയം സര്‍ക്കാര്‍ പ്രഖ്യാപിച്ചിരിക്കയുമാണ്. ഈ സാഹചര്യത്തില്‍ നൊവാര്‍ട്ടിസ് കേസിലെ വിജയത്തില്‍നിന്ന് ആവേശമുള്‍ക്കൊണ്ട് ജനകീയ ഔധനയത്തിനായി കൂടുതല്‍ ശക്തമായ പോരാട്ടങ്ങള്‍ക്ക് ജനകീയ ആരോഗ്യപ്രസ്ഥാനങ്ങള്‍ തയാറാകേണ്ടിവരും.


നിങ്ങളുടെ അഭിപ്രായങ്ങള്‍

ഇവിടെ കൊടുക്കുന്ന അഭിപ്രായങ്ങള്‍ മാധ്യമത്തിന്റെ അഭിപ്രായമാവണമെന്നില്ല.
Please Note:
അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.
comments powered by Disqus